Astana Opera teatrynda túrli halyqtyń tilinde án shyrqalady
ASTANA. QazAqparat - Qazaqstan halqy Birliginiń kúnine arnalǵan «Týǵan elime tilegim» atty merekelik kontsert «Astana Opera» teatrynyń Úlken zalynda 1 mamyrda ótedi.
Kesh operanyń jetekshi solıstteriniń, Qazaqstannyń eńbek sińirgen qaıratkeri Abzal Muhıtdınov basqaratyn «Astana Opera» Sımfonııalyq orkestri qatysady,
dep habarlaıdy teatrdyń baspasóz qyzmeti. Rejısseri - Natalıa Kagadıı.
Kórnekti opera solısteri - Janat Shybyqpaev, Beıimbet Tańaryqov, Bıbigúl Januzaq, Aızada Qaponova, Tatıana Vıtsınskaıa sııaqty taǵy basqa qazaq, armıan, orys, bashqurt, ıtalııa, ıspan, frantsýz jáne ózge tilderdegi shyǵarmalardy oryndaıdy. Merekelik kontsertti hor jáne balet ártisteriniń qatysýymen A. Jubanov pen L. Hamıdıdiń «Abaı» operasynan sahnalyq kórinis ashady. Kontsert sońynda qazaq opera jáne balet óneriniń úzdik týyndylary usynylady.
«Oryndaýshylar ózderiniń kásibı sheberligimen qatar qazaq mádenıetine degen súıispenshiligi men qurmetin, sondaı-aq óziniń ulttyq mádenıetiniń ereksheligin kórsete alatyn mundaı merekeniń bolǵany qandaı jaqsy. Mysalǵa alatyn bolsaq, Armenııanyń halyq ártisi Barseg Týmanıan qazaq tilinde A. Jubanov pen L. Hamıdıdiń «Abaı» operasynan Syrttannyń arııasyn jáne armıandyq operadan alynǵan arııany ana tilinde oryndaıdy. Bashqurtstannyń eńbek sińirgen ártisi Álfııa Kárimova bashqurt halyq áni «Sandýǵashty» shyrqaıdy. Balet ártisteri B. Asafevtiń «Baqshasaraı burqaǵy» baletinen tatar bıin jáne V. Solovev-Sedoıdyń «Taras Býlba» baletinen «Gopak» ýkraındyq bıin bıleıdi. Kontserttiń túpki maqsaty - Qazaqstanǵa degen shynaıy súıispenshilik sezimin bildirý», - dep atap ótti Natalıa Kagadıı.
Mereke 1996 jyldan bastap atap ótiletinin eskerte ketsek. 1995 jyly 18 qazanda Qazaqstan Respýblıkasynyń Prezıdenti Nursultan Nazarbaev 1 mamyr kúnin Qazaqstan halqynyń Birligi kúni dep jarııalaý týraly Jarlyqqa qol qoıdy. Ultaralyq jáne dinaralyq kelisimdi saqtaý bizdiń elimizdiń negizgi basymdyqtarynyń biri bolyp tabylady. Halyqtar dostyǵy, beıbit kún - mine, bul tabysty shyǵarmashylyq pen ónerdiń gúldený negizi.
