«Astana Opera» teatrynda opera jáne balet ártisteriniń teatrlyq kostıýmderi kórmesi ashylady (FOTO)
ASTANA. QazAqparat - 5 maýsymda elorda turǵyndary men qonaqtary «Astana Opera» MOBT murajaıy qorynyń «Sahna shejiresi» atty kórmesin tamashalaý múmkindigine ıe bolady. Kórmege Qazaqstannyń opera jáne baletiniń asa kórnekti qaıratkerleri men ártisteriniń tarıhı teatrlyq kostıýmderi men fotomurajaı materıaldary qoıylady, dep habarlaıdy teatrdyń baspasóz qyzmetinen.
Atap aıtqanda, Ǵarıfolla Qurmanǵalıev, Roza Baǵlanova, Ermek Serkebaev, Ázirbaıjan Mámbetov, Erkeǵalı Rahmadıev, Roza Jamanova, Sara Kósherbaeva, Baqyt Áshimova, Dáýren Ábirov, Vasılıı ıAkovenko, Myńjasar Mańǵytaev, Sultan Baısultanov, Bıbigúl Tólegenova, Narıman Qarajigitov, Álibek Dinishev, Qorlan Qalılambekova, Rahıma Jubaturova, Nurjamal Úsenbaeva, Gúljan Tutqybaeva, Maıra Muhamedqyzy, Jámılıa Baspaqova syndy óner maıtalmandarynyń shyǵarmashylyq jolynan syr shertetin jádigerler kópshiliktiń kózaıymyna aınalmaq.
«Astana Opera» murajaıynyń meńgerýshisi Qusaıynova Aprıza bul qundy muralar jaıly aıtyp ótti. «Bul kostıýmder, turmystyq buıymdar, jumys quraldary ártisterden qalǵan estelik, solardyń kózi. Sol kezde osy ártister bolmasa, búgingi mádenıetimiz dál osyndaı baı bolmas edi. Biz búkil Qazaqstannyń operasy men baletine tikeleı qatysy bar eksponattardy jınap, teatr qoryn qurýdy uıǵardyq. Teatrlyq kostıýmderdi, murajaı qujattaryn, fotomaterıaldardy aǵymdaǵy jyldyń aqpanynda jınaı bastadyq. Abaı atyndaǵy opera jáne balet teatry bizge Qazaqstannyń opera jáne baletiniń belgili qaıratkerleri beınelengen 11 kartınany jáne asa kórnekti ártisterimizdiń sahnada kıgen kostıýmderin qurmetpen syıǵa tartty. Biz tek solıster ǵana emes, jalpy elimizdiń opera jáne balet óneriniń qalyptasýyna qatysy bar barlyq qaıratkerler jaıly da materıaldardy jınaýdy maqsat ettik. Búginde qorymyzda 21 teatrlyq kostıým jáne myńnan astam fotomurajaı materıaldary bar. Biz munymen shektelmeımiz, alda atqarylatyn talaı jumys bar», - deıdi Qusaıynova Aprıza. Aıta keteıik, «Astana Opera» jańa teatrynyń sahnasynda Qazaqstannyń Halyq ártisteri jáne eńbek sińirgen qaıratkerleri, opera jáne balet juldyzdary óner kórsetedi. Olardyń esimderi sahna shejiresine jazylyp, óskeleń urpaqqa mura bolyp qalady. Ekskýrsııa saǵat 11:00-den 12:00 deıin jáne saǵat 15:00-den 16:00 deıin júrgiziledi.
