«Astana Opera» teatrynda Muqaǵalı Maqataevtyń 84 jyldyǵyna oraı mýzykalyq-poezııalyq kontsert ótedi
ASTANA. QazAqparat - Qazaqtyń mańdaıyna bitken asa kórnekti aqyny Muqaǵalı Maqataevtyń 84 jyldyǵyna oraı 8 aqpanda «Astana Opera» teatrynyń Mármár zalynda mýzykalyq-poezııalyq kontsert ótedi, dep habarlady teatrdyń baspasóz qyzmeti.
Maqataevtanýshy, fılologııa ǵylymdarynyń doktory, Abaı atyndaǵy QazUPÝ professory Sáýle Ábisheva «Maqataev jyrlarynyń qupııasy nede? Olardyń qaıtalanbas áserli keletini neden? Janyńdy baýrap alyp, ne sebepti jibermeı qoıady?», degen suraqtarǵa jaýap izdeýmen keledi: «Adam bolmysyna degen mahabbat, ómirge degen mahabbat, onyń barlyq kórinisteri - máni men mazmuny jaǵynan fılosofııalyq bolyp tabylatyn onyń poezııasynyń fenomeni. M. Maqataevtyń óleńderi onyń Otanyna, týǵan jerine, halqyna jáne týǵan tiline degen mahabbatynyń negizinde órilip, boıǵa naǵyz patrıottyq qýat beredi», - deıdi Sáýle Ábisheva. Kemeńger aqyn ózin HHI ǵasyrdyń urpaǵymen qurdas ekenin, múmkin, odan arǵy býynmen týys shyǵarmyn dep jazǵan...
«Astana Opera» teatrynyń kórkemdik basshylyǵy eki uly jaýhar - Muqaǵalı Maqataevtyń «Motsart. Jan azasy» poemasy men V. A. Motsarttyń «Rekvıemin» bir kontsert aıasynda biriktirýdi jón kórdi. Osylaısha, kórermenge mýzykalyq-poezııalyq dıalog usynylady. Kompozıtordyń uly mýzykasyna aqyn óleńmen jaýap qatty. Volfgang Amadeı Motsarttiki sııaqty Muqaǵalı Maqataevtyń da ǵumyry qysqa, alaıda jarq etken shyǵarmashylyq ómir boldy. «Rekvıem» - ekeýiniń de sońǵy shyǵarmasy. Mýzykalyq-poezııalyq «Rekvıemdi» tyńdap otyryp, bastan keshken árbir kúnniń qýanyshy men ómirdiń qundylyǵy jaıly eriksiz oıǵa batasyń», - deıdi Baıǵalı Mombekov.
Keshte «Astana Opera» teatrynyń solısteri: soprano, QR eńbek sińirgen qaıratkeri Aıgúl Nııazova; metstso-soprano, QR eńbek sińirgen qaıratkeri Dına Hamzına; tenor Ramzat Balaqyshıev; bas Bolat Esimhanov óner kórsetedi; Muqaǵalı óleńderin - QR eńbek sińirgen qaıratkeri Baıǵalı Mombekov; kontsertke «Astana Opera» hory jáne sımfonııalyq orkestri qatysady, dırıjer - QR eńbek sińirgen qaıratkeri Erjan Dáýitov.
