«Astana Opera» teatrynda «Mahabbatym meniń - opera» kontserti ótedi
ASTANA. QazAqparat - 22 sáýirde «Astana Opera» teatrynyń Kameralyq zalynda «Mahabbatym meniń - opera» atty kontsert ótedi, dep habarlaıdy atalǵan teatrdyń baspasóz qyzmeti.
Uıymdastyrýshylardyń aıtýyna qaraǵanda, elorda turǵyndary men qonaqtaryn erekshe kontserttik baǵdarlama kútedi. Kórermen qaýymnyń aldynda «Astana Operanyń» jetekshi solısteri, Qazaqstannyń eńbek sińirgen qaıratkerleri Saltanat Ahmetova men Talǵat Musabaev, Armenııadan shaqyrylǵan bas qonaq, halyqaralyq baıqaýlardyń laýreaty Sarkıs Bajbeýk-Melıkıan, fortepıano partııasynda - «Mádenıet qaıratkeri» Elena Sahno óner kórsetpek.
«Osy joly elorda turǵyndary men qonaqtaryna erekshe kontsert usynatyn bolamyz. Keshke qatysatyn árbir vokalıstiń shyǵarmashylyǵy kóptegen óner súıer qaýymdy únemi zalǵa tartyp, baýraıtyny anyq. Ártister tek áriptes qana emes, jaqyn dostar bolyp ketken. Mýzykalyq keshtiń daıyndyǵyna bárimiz birdeı jumyldyq. Kórermenimizge súıikti oryndaýshylarymen kezdesý baqytyn syılap qana qoımaı, opera janrynyń san alýandyǵyn, mánerligin, qanyqtyǵyn jańa qyrynan kórsetkimiz keldi», - dep atap ótti kontserttiń avtory Elena Sahno.
Kontsertte V.A.Motsarttyń «Don Jýan» operasynan Leporello arııasy, Dj.Verdıdiń «Sımon Bokkanegra» operasynan Fıesko arııasy, «Sıtsılııalyq keshkilik» operasynan Prochıda arııasy, «Makbet» operasynan Banko arııasy, P.Chaıkovskııdiń «Evgenıı Onegın» operasynan Gremın arııasy, A.Borodınniń «Knıaz Igor» operasynan Konchak hannyń arııasy jáne t.b. shyrqalady.
«Rossııa - Kýltýra» telearnasyndaǵy «Bolshaıa opera» halyqaralyq jobasynyń Gran-prı ıegeri Saltanat Ahmetova Dj.Pýchchınıdiń «Madam Batterflıaı» operasynan Chıo-Chıo-san monologyn, «Týrandot» operasynan Lıý arııasyn, Dj.Verdıdiń «Sıtsılııalyq keshkilik» operasynan Elena bolerosyn jáne t.b. shyǵarmalardy usynady.
Qazaqstandyq ataqty opera solısi Talǵat Musabaev tyńdaýshylardy Ý.Djordanonyń «Andre Shene» operasynan Jerar monologymen, Dj.Verdıdiń «Bal-maskarad» operasynan Renato monogolymen qýantady.
«Mahabbatym meniń - opera» kontserti saǵat 18:00-de bastalady.
