«Astana Opera» teatrynda qazaq jáne orys romanstary oryndalady
ASTANA. 11 qańtar. QazAqparat - 13 qańtarda «Astana Opera» teatrynyń kameralyq zalynda Eski Jańa jylǵa oraılastyrylǵan «Jańa jyldyq serpantın» kontserti ótedi. Bul týraly astana.kz saıtyna «Astana Opera» MOBT baspasóz qyzmetinen habarlady.
Kontsertte «Belcanto» (ıtal. "tamasha án salý") mýzykalyq salony tanystyrylady. Bul keshte kórermen nazaryna qazaqtyń, orystyń, ıspandyq halyq ánderi, frantsýzdyq shanson, M. Dýnaevskııdiń, I. Shtraýstyń, J. Offenbahtyń operettasynan úzindiler jáne basqasy usynylady. Keshti qazaq jáne orys romanstary ashady.
Kontsertti uıymdastyrýshylardyń aıtýynsha, kontserttiń ádebı bólimi Kúmis ǵasyrdyń poezııasy men qazirgi qazaq lırıkasyna arnalady. Kontsertke «Astana Opera» teatrynyń jeke oryndaýshylary, QR eńbek sińirgen qaıratkerleri: Janat Shybyqpaev, Aıgúl Nııazova, Súndet Baıǵojın, Dına Hamzına, Gúlzat Dáýirbaeva, Jamılıa Jarqymbaeva, Margarıta Dvoretskaıa jáne ataqty barıton Azamat Jyltyrkózov, QR eńbek sińirgen ártisteri: Janat Baqtaı, Ǵalııa Baıǵazınova, Halyqaralyq konkýrstardyń laýreattary: Beıimbet Tańaryqov, Eskendir Ábjanov, Saltanat Ahmetova, Jupar Ǵabdýllına, Elena Ganja qatysady.
Sonymen qatar, fortepıano partııasyn súıemeldeýshi pıanısterdiń halyqaralyq konkýrsynyń laýreaty (Bolgarııa, Italııa) R. Beskempirova, halyqaralyq konkýrstardyń dıplomanttary E. Sahno, J. Ahmetova, D. Úmbetálıeva, I. Kýrgýzkına oryndaıdy.
Eske salaıyq, kontsert 13 qańtarda «Astana Opera» kameralyq zalynda saǵat 19.00-de ótedi.
