«Astana Opera» teatrynda Gaıdn men Motsarttyń shyǵarmalary oryndalady
ASTANA. 14 qańtar. QazAqparat - 2014 jyldyń 16 qańtarynda «Astana Opera» teatrynyń Kameralyq zalynda «Uly esimder: I.Gaıdn, V.Motsart» atty kontsert ótedi. Bul týraly teatrdyń baspasóz qyzmeti habarlady.
Keshte «Astana Opera» teatrynyń tamasha solısteri: QR eńbek sińirgen qaıratkeri Aıgúl Nııazova (soprano), Saltanat Ahmetova (soprano), halyqaralyq konkýrstardyń laýreaty Marat Zákárııanov (trýba), Raqymjan Baspaev (fortepıano) óner kórsetedi.
Birinshi bólimde belgili kompozıtor I. Gaıdn shyǵarmalary shyrqalady, sonyń ishinde áıgili shyǵarmalardyń biri - «Astana Opera» teatrynyń balalar operalyq stýdııasy aspaptar ansambli oryndaıtyn «Balalar sımfonııasynyń I bólimi» bar. Ekinshi bólimde dara týǵan avstrııalyq kompozıtor V. Motsarttyń shyǵarmashylyǵy pash etiledi. Uly klassıkterdiń mýzykasyn «Astana Opera» teatrynyń kameralyq orkestri oryndaıdy.
Mýzykatanýshy Sáýle Máýletova kontserttiń kórnekti venalyq klassıkterdiń shyǵarmashylyǵyna arnalatynyn atap ótti. «Volfgang Amadeı Motsarttyń ustazy Iozef Gaıdn klassıtsızmniń negizin qalaýshy bolyp tabylady. Bul eki kompozıtordyń shyǵarmalary ár túrli: Motsarttyń mýzykasy jasampaz, aıqyn kelse, Gaıdnnyń mýzykalyq tili ustamdy», - deıdi Sáýle Máýletova.
«Bizdiń aldymyzǵa qoıǵan maqsatymyz - sahnaǵa klassıtsızm dáýiriniń raıyn berip, uly kompozıtorlardyń mýzykasy arqyly kórermendi sol bir ótken ǵasyrǵa sapar shektirý. Kórermenge arnalǵan tosyn syıymyz kóp», - dep atap ol.
Kontsertte halyqaralyq konkýrstardyń laýreaty, Chaıkovskıı atyndaǵy Máskeý memlekettik konservatorııanyń túlegi Raqymjan Baspaev dırıjerlik etedi.
