«Astana Opera» teatrynda Dj. Pýchchınıdiń «Bogema» operasy qoıylady
ASTANA. QazAqparat - Sáýirdiń 11 men 13-kúnderi «Astana Opera» teatrynda Dj. Pýchchınıdiń «Bogema» operasy qoıylady. Bul týraly búgin teatrdyń mýzykalyq jetekshisi, QR Eńbek sińirgen qaıratkeri Abzal Muhıtdınov málim etti.Onyń aıtýynsha, bul elimizdiń mádenı ómirindegi mańyzdy jańalyqtardyń biri bolmaq.
«Astana Opera» ujymy úshin bul opera óte mańyzdy. Óıtkeni «Bogema» operasyna tek qana ózimizdiń ártister qatysady. Sonyń ishinde bul úlken jaýapkershilik jastardyń moınyna júktelip otyr. Halyqaralyq konkýrs boıynsha ıtalııalyq ataqty Arena dı Verona teatrynda partııa oryndaý quqyǵyn jeńip alǵan Súndet Baıǵojın, Medet Shotabaev, Álfııa Kárimova syndy ártisterimiz de osy qoıylymnyń kórki bolady», - dep atap ótti A. Muhıtdınov.
Onyń aıtýynsha, operada basty partııany oryndaıtyndar: Medet Shotabaev, Jan Tápın (Rýdolf), Aıgúl Nııazova, Jannat Baqtaı (Mımı), Álfııa Kárimova, Saltanat Ahmetova, Jámıla Jarqymbaeva (Mıýzetta), Múndet Baıǵojın, Talǵat Musabaev (Marsel) Baýyrjan Ándirjanov, Artýr Qaıypqulov (Kollen), Evgenıı Chaınıkov (Shonar). Aıta keteıik, operada ómirleri kóbine qaıǵyly keletin óner adamdarynyń taǵdyry baıandalady. Onda jazylmaıtyn dertke shaldyqqan Mımıge ǵashyq bolatyn kedeı aqyn Rýdolftiń mahabbaty jáne Marsel esimdi sýretshi men onyń jeńiltek dos qyzy Mıýzettanyń hıkaıasy kórsetiledi. Sondaı-aq, operaǵa «Astana Operanyń» balalar stýdııasy horynyń ártisteri tuńǵysh ret qatysady.
