«Astana Opera» teatrynda Barseg Týmanıannyń jeke kontserti ótedi

«Barseg Týmanıan shaqyrady» kontserti - álemniń kóptegen qalalarynyń sahnasynda jeke kontserti ótken áıgili ártisti barlyq qyrynan ashyp, tanystyrady. Klassıkalyq opera mýzykasyn baǵalaýshylarǵa vokaldyq mýzykanyń túrli janrlary men baǵyttarynan turatyn týyndylardyń keń aýqymy pash etiledi.

«Bul kontsert - G.F. Gendel, F. Shýbert, V.A. Motsart, Dj. Verdı, S.V. Rahmanınov, P.I. Chaıkovskıı sııaqty álemdik klassıkterdiń, sondaı-aq búgingi amerıkandyq kompozıtorlardyń týyndylarynyń jıyntyǵynan turatyn ózinshe bir mýzykalyq «toptama/shoǵyr»», - deıdi «Astana Opera» teatrynyń jetekshi solısti Barseg Týmanıan.

«Tyńdarman mol áser men kóterińki kóńil-kúıge bólenedi. Bul keshte qaıǵyly, lırıkalyq, mahabbat jaıly, fılosofııalyq jáne tipti ázázil jaıynda týyndylar usynylady. Іriktelgen baǵdarlama ártistiń ishki álemi jaıly syr shertedi. Kontserttik baǵdarlama janrynyń áralýandyǵy oryndaýshynyń jan-jaqtylyǵyn, shyǵarmashylyq múmkindiginiń zor ekenin kórsetedi», - deıdi kontsertmeıter Dolores Úmbetálıeva.

Álemdik deńgeıdegi bas daýysynyń ıesi Barseg Týmanıan elordalyq teatrdaǵy jumysynan alǵan áserlerin ortaǵa saldy: «Bul meniń Qazaqstanda alǵash jumys isteýim. Buǵan deıin kóptegen áıgili de, sonshalyqty aty shyqpaǵan álem teatrlarynda da óner kórsettim. «Astana Operanyń» kúsh-qýaty men jumysqa degen yntasy zor tamasha jas hory, ǵajap oınaıtyn orkestri bar. Munda shyǵarmashylyqpen aınalysýǵa jaqsy jaǵdaı jasalǵan. Qazaqstandyq mýzyka súıer qaýymǵa ózimniń birinshi jeke kontsertimdi usyný men úshin úlken qurmet jáne joǵary jaýapkershilik».

Fortepıano partııasyn «Astana Opera» teatrynyń kontsertmeısteri, halyqaralyq konkýrstardyń dıplomanty Dolores Úmbetálıeva oryndaıdy.

Sondaı-aq osy kúni Venetsııada qazirgi ónerdiń Bıennale medalin ıelengen sýretshi Naıra Týmanıannyń eńbekteriniń kórmesi ótedi. Toptama «Astana» dep atalady.

Kontsert eki bólimnen turady, dep habarlaıdy elorda ákimdiginiń resmı saıty.