«Astana Opera» teatrynda balalar kúnine oraı jas jetkinshek ártister óner kórsetedi
ASTANA. QazAqparat - «Mýzyka álemindegi tańǵajaıyp hıkaıalar» atty kontsert «Astana Opera» teatrynyń Kameralyq zalynda ótetin balalarǵa arnalǵan jazǵy is-sharalar legin bastaıdy, dep habarlaıdy teatrdyń baspasóz qyzmeti.
1 maýsym - Halyqaralyq balalardy qorǵaý kúnin atap ótýge merekeniń basty keıipkerleri - teatrdyń balalar hory men balet stýdııasynyń jas ártisteri shaqyrady.
«AstanaOpera» teatrynyń rejısseri ári kontsert ıdeıasynyń avtory Natalıa Kagadıı barlyq nomerler bir dramatýrgııa boıymen tiziletinin atap ótti.
- Kontsertke qatysýshylar - teatrdyń Úlken zalynda túrli amplýada oınap júrgen balalar stýdııasynyń ártisteri, bul joly kádimgi balalardyń rólinde shyǵady. Olardyń oqýlary aıaqtaldy, endi, mine, kópten kútken demalystary bastaldy. Sabaqtar men shekteýlerden bosaǵan balalardyń kóńili shattyqqa toly. Olardy dostyqtyń qadirin bilip, meıirimdilik pen álemdegi bar jaqsylyqty tanýdy úıretetin synaqtar kútip tur. Bul tusta olarǵa mýzyka kómektesedi, - dep támamdady rejısser.
Ár nomer ózinshe bir hıkaıa - jas ártister mýltfılm, ertegi álemine, tipti V.Motsarttyń «Sıqyrly fleıta» operasyna da tap bolady. Kontsertke balalar stýdııasy tolyq qatysady, ondaǵy hor men balette 105 qatysýshy bar.
Otandyq kompozıtorlardyń ánderi: Q. Saqaıdyń «Mektep-ana», T. Muhamedjanovtyń «Zaman-aı», M. Іlııasovtyń «Merekem - sen» jáne basqalarynyń, sonymen qatar neapolıtandyq «O sole mio!» áni shyrqalady. Ártister djaz stılindegi ónerin aǵylshyn tilinde oryndalatyn H. Bıbıdiń «Who says I can't read music» jáne «Hats», D. Shvartstyń «You gotta generate heat», L. Koennyń «Allılýıa», H.M. Kanonyń «Hijo de la luna», F. Sartorıdiń «Con te partirò» (Time to say goodbye) kompozıtsııalary arqyly pash etedi. Oryndaıtyndyr: Laýra Kúlekesheva, Ánel Orazbaeva, Alısa Shaıpak, Aısha Orynbasarova, Adılıa Sársenova, Darıǵa Bilálova, Gúlbaný Erjanova jáne basqalary.
Jannur Bákesheva men Dına Salaýatovanyń basshylyǵyndaǵy balet stýdııasynyń ártisteri qazaq bıi «Daıdıdaý», «Balalar ýaqyty emes», «Demalys ýaqyty» jáne «Yellow submarine» men «Let it go» ánderine qoıylǵan horeografııalyq kompozıtsııalardy kórsetse, Kún shyǵys eliniń ókilderi Harýka Sato, Reıka Shımamýra, Erı Kýrakava japon bıi «Sakýrany» oryndaıdy. Zaǵıpa Ábisheva Ts. Pýnıdiń «Esmeralda» baletinen nomer kórsetedi, al E. Morrıkoneniń mýzykasyna qoıylǵan Sý perisiniń beınesinde sahnaǵa Ánel Bolat shyǵady.
- Biz balalarǵa jazǵy demalysta nebir tańǵajaıyp hıkaıalardy bastan keshýdi, sondaı-aq kún sáýlesinen mol qýat alyp, oqý jylyna jańa kúsh jınaýdy jáne maqsattaryna jetýdi tileımiz, - dep tiledi balalar stýdııasynyń hormeısteri Altynǵanym Ahmetova.
