«Astana Opera» teatrynda alǵash ret operetta men mıýzıkl qoıylady - «Astana keshteri» festıvali
ASTANA. QazAqparat - «Astana keshteri» festıvali aıasynda «Astana Opera» teatry sahnasynda alǵash ret operetta men mıýzıkl janryndaǵy qoıylymdar usynylmaq. Bul týraly festıvaldiń shyǵarmashylyq jetekshisi, QR eńbek sińirgen qaıratkeri Tımýr Ormanshıev málim etti.
«Astana keshteri» IV halyqaralyq óner festıvali Astanada 4-6 maýsym aralyǵynda ótedi.
Festıval «Degdar» qaıyrymdylyq qorynyń tóraǵasy Darıǵa Nazarbaevanyń bastamasymen ótedi. 2012-2013 jyldary festıvaldi álemge tanymal mýzykatanýshy Svıatoslav Belza júrgizdi. Joba kontsertteriniń birine Memleket basshysy Nursultan Nazarbaev ta qatysqan bolatyn.
Uıymdastyrýshylardyń aıtýynsha, bul joba qaıyrymdylyq maqsatynda uıymdastyrylyp, bıletter tegin taratylady. Festıval uıymdastyrýshylary halyqqa álemdik mádenıet shedevrlerin tanystyrýdy maqsat etip qoıdy.
«4 maýsym kúni «Astana Opera» sahnasynda alǵash ret klassıkalyq operetta men mıýzıkl qoıylady. Osy kúni «Operetta keshi» atty kontsertpen Darıǵa Nazarbaeva óner kórsetedi. Sonymen qatar alǵashqy kúni Qazaqstannyń eńbek sińirgen qaıratkerleri Súndet Baıǵojın, Andreı Tregýbenko, Bashqurtstannyń eńbek sińirgen qaıratkeri Alfııa Karımova, halyqaralyq baıqaýlardyń laýreaty Meıir Báınesh, máskeýlik dırıjer Mıhaıl Hvatynets, «Astana Opera» teatrynyń hory, baleti men orkestri, Vivat jáne Alekseı Velıjanınniń shoý baletteri keledi», - dep atap ótti T.Ormanshıev.
Festıval sahnasynda halyq, klassıka jáne estrada salasynyń ózge de ánshileri óner kórsetedi. Sonyń ishinde, reseılik «Kvarto» toby men Qurmanǵazy atyndaǵy halyq aspaptary orkestri, Aıman Musaqojaeva, Larısa Dolına jáne ázerbaıjandyq «Mýgam» ansambli bar.
«5 maýsym kúni álemdk fortepıano jáne vokaldyq mýzykanyń keshi bolady. Oǵan Qazaqstannyń eńbek sińirgen qaıratkerleri Tımýr Ormanshıev pen Azamat Jyltyrkózov, halyqaralyq baıqaýlardyń jeńimpazy Arman Tileýbergenov qatysady. Sonymen qatar ánshi Gúlzat Daýylbaeva án salady. Men ony qazaqtyń Monserrat Kabalesi dep atar edim. Gúlzat - jumsaq ári ádemi tembrdiń ıesi. Onyń daýsy barlyǵyn tańqaldyratyny sózsiz. Al 6 maýsymda qazirgi zamanǵy balettiń keshi ótedi», - dep atap ótti festıval jetekshisi.
Festıval 4 jáne 5 maýsymda «Astana Opera» teatrynda ótedi. Festıvaldiń qorytyndy keshi Beıbitshilik jáne kelisim saraıynda bolady.
Bıletter tegin bolady. T.Ormanshıevtiń aıtýynsha, 1 maýsym kúni Beıbitshilik jáne kelisim saraıynda 3 myńǵa jýyq bılet taratylmaq.
