«Astana Opera» teatry ujymy Qytaıda óner kórsetýde
ASTANA. QazAqparat - «Astana Opera» teatrynyń balet trýppasy Qytaıdyń Úrimji qalasyna mazmundy baǵdarlama alyp barmaqshy. Ártister 25 jáne 26 qyrkúıekte, Shyńjań teatrynyń sahnasynda ótetin Gala balette óner kórsetedi, dep habarlaıdy teatrdyń baspasóz qyzmeti.
30 astam bıshi klassıkalyq balet murasynan nómirler oryndaıdy. Máselen, aspan asty eliniń kórermenine Ts. Pýnıdiń «Esmeralda» baletinen Pa-de-sıs, I. Baıerdiń «Qýyrshaqtar perisi» baletinen trıo, K. Sen-Sanstyń «Ólim aldyndaǵy aqqý», L. Mınkýstyń «Don Kıhot» baletinen pa-de-de, N. Rımskıı-Korsakovtyń «Sheherazada» baletinen dýet jáne taǵy basqalaryn usynady.
- Biz Halyqaralyq Shyńjań bı festıvaline baramyz, bul, bir jaǵynan, mádenı tájirıbe almasý bolady. 2014 jyly qytaılyq bı óneriniń sheberleri «Astana Opera» teatrynyń sahnasynda óner kórsetken. Ol kezde ártister álemdi ózderiniń qyzyqty da kúrdeli qoıylymdarymen qaıran qaldyrdy, degenmen, jalpy alǵanda, olar kóbine basty nazardy qytaıdyń halyq bılerine aýdardy. Bizdiń mindet - jergilikti kórermenge olardyń sahnalarynda sırek qoıylatyn biryńǵaı klassıkalyq baletti pash etý. Qytaı kórermeniniń balettiń bul túrin qalaı qabyldaıtyny bizge baılanysty. Ol úshin biz barymyzdy salyp, tyrysamyz, - dep atap ótti balet trýppasynyń kórkemdik jetekshisi Altynaı Asylmuratova.
Ártistermen birge barlyq komanda - kostıýmerler, grımdeýshiler, jaryq sýretshileri, dybys jáne beıneoperatorlar barady. Kontserttik baǵdarlama bir bólimnen turady. A. Zaklınskaıa, J. Ahmedıev, A. Tólepova, B. Tonosakı, M. Shákimova, M. Kıtamýra, G. Jantemir, E. Sársembaev, A. Orazov, N. Aımuhametova sııaqty jas ártistermen qatar qazaqstandyq tanymal bıshiler - G. Ýsına, M. Baspaeva, Á. Beketaeva, R. Seıitpekov, B. Adamjan jáne basqalary da óz sheberlikterin kórsetpekshi.
- Ártister úshin ózderiniń týǵan sahnasynda óner kórsetýmen qatar, gastroldik tájirıbe de óte mańyzdy. Neǵurlym úlken saparǵa shyqsa, soǵurlym olar jattyǵyp, shyńdalady. Árbir ártis óziniń úzdik nómirin kórsetedi, mysaly, balettiń jetekshi solısi Áıgerim Beketaeva K. Sen-Sanstyń «Ólim aldyndaǵy aqqýyn» daıyndaıdy. Áıgili balerına bul nómirdi óz nusqasynda tamasha jetkizetindigimen tanymal ekenin bilesizder. Sondaı-aq, baǵdarlamaǵa bizdiń sahnada jaqynda qoıylǵan baletterden nómirler engizildi. Mysaly, M. Jarrdyń «Parıj Qudaı Anasynyń sobory» baletinen dýet usynylady, ony Qazaqstannyń eńbek sińirgen qaıratkerleri Rústem Seıitpekov jáne Mádına Baspaeva oryndaıdy, - dep túsindirdi A. Asylmuratova.
