«Astana Opera» teatry týraly kitap jaryqqa shyqty
ASTANA. 18 qazan. QazAqparat - Atalmysh kitaptyń tanystyrylymy «Astana Opera» teatrynyń álemdik tusaýkeserinde ótpek. Bul týraly búgin atalmysh óner ordasynyń dırektory, kompozıtor Tólegen Muhamedjanov málim etti.
Onyń aıtýynsha, ázirshe 2 myńnan astam tırajben jaryq kórip otyrǵan bul kitap jańa teatrdy kórýge kelgen tanymal shetel teatrlarynyń jetekshilerine, álemdik deńgeıdegi óner ujymdaryna, synshylarǵa taratylatyn bolady.
«Biz teatrdyń álemdik tusaýkeserinde kópshilik nazaryna usynylatyn tamasha ári kórkem kitap shyǵardyq. Bul árbir meımanǵa bizdiń teatrdan estelik retinde tartý etilsin degen nıetten týyp otyr. Dúnıeni jasaýda otandyq fotograftar men ádebı-mýzykalyq mamandardyń eńbegi eleýli boldy. Teatrdy eń keremet qyrynan tanytýǵa tyrystyq», - dedi T. Muhamedjanov.
Aıta keteıik, «Astana Opera» teatrynyń Álemdik tusaýkeserine oraı tórt kesh ótedi. Basty kesh - 2013 jyldyń 21 qazany - Dj. Verdıdiń «Attıla» operasynyń tusaýkeseri bolmaq. Kórermen nazaryna usynylatyn operalyq spektakldi daıyndaýǵa attary álemge áıgili sheberler shaqyryldy. Qoıýshy rejısseri, stsenografy, kostıým jónindegi sýretshisi - álemge belgili ıtalıandyq sheber, Frantsııanyń Qurmetti Legıony Ordeniniń ıegeri Per Lýıdjı Pıtstsı.
Sonymen qatar álemdik tusaýkeser aıasynda «Astana Opera» teatrynda tuńǵysh ret 22 qazanda ǵylymı-tájirıbelik konferentsııa ótedi. Oǵan Anglııa, Italııa, Ispanııa, Reseı jáne Qazaqstannan álemdegi iri teatrlardyń dırektorlary men dúnıe júziniń 25 elinen keletin belgili teatr synshylary qatysady dep kútilýde.
