«Astana opera» teatry Rojdestvony mýzykamen qarsy alýdy usynady

Al 25 jáne 27 jeltoqsanda kórermendi «Bel Canto mýzykalyq salony» abonementi aıasynda ótetin «Rojdestvo áýenderi» atty kontsert kútedi, dep habarlaıdy teatrdyń baspasóz qyzmeti.

Tarıhı turǵydan Qazaqstan árqashan Shyǵys pen Batys órkenıeti men mádenıeti, túrli dinder toǵysatyn dıalogtar alańy boldy. Respýblıkamyzda shamamen 80 myń katolık turatyny belgili. Rojdestvo - bul hrıstıan meıramdarynyń mańyzdylarynyń biri jáne ol álemniń 100 astam elinde memlekettik meıram. Qazaqstan katolıkteri de ony keńinen atap ótedi. Dástúr boıynsha saltanattyń basty sıpaty - úıde shyrsha bezendirý. Bul úrdis ómir men ónimniń belgisi retinde Germanııa halqynda týǵan.

Rojdestvonyń qurmetine Mármár zalda G.F. Gendeldiń «Messııa» oratorııasy oryndalady. Bul - kompozıtordyń eń jarqyn, ári shattyqqa toly shyǵarmalarynyń biri. «Messııa» oratorııasy Nárestege syılyq ákelgen sıqyrshylar týraly baıandaıdy. Kontsertke kelgen tyńdarmandy ásem mýzyka baýrap áketedi, munda avtor mahabbat pen baqytqa jeteleıtin úmit pen qýanyshty basty taqyryp retinde alǵan. Oratorııany oryndaıtyndar - soprano, Bashqurtstannyń eńbek sińirgen ártisi Álfııa Kárimova, metstso-soprano - Saltanat Muratbekova, tenor - Qazaqstannyń eńbek sińirgen qaıratkeri Jan Tápın, bas - Armenııa halyq ártisi Barseg Týmanıan. «Astana Opera» hory men orkestri. Bas hormeıster - Qazaqstannyń kórnekti qaıratkeri Erjan Dáýitov, dırıjer - Qazaqstannyń eńbek sińirgen qaıratkeri Abzal Muhıtdınov.

25 jeltoqsanda, Rojdestvo kúni, «Rojdestvo áýenderi» kontsertinde «Astana Opera» teatrynyń opera solısteri men aspapshylary kórermenge tamasha kóńil-kúı syılaıdy. Olar: A. Malınovskıı, K. Krasıýkov, J. Jarqymbaeva, Á. Sembına, R. Nurkeı, E. Nızamýtdınova, M. Islamova, E. Ganja, S. Muratbekova, G. Sapaqova, M. Báıneshov, N. Toıkenov, J. Shybyqpaev, E. Ábjanov, T. Ǵaleev, B. Esimhanov jáne t.b.

Kórermendi Aıaz Ata men Aqshaqardyń, Sıqyrshy-mystan men basqa da ertegi áleminiń jarqyn keıipkerleriniń qatysýymen ótetin kóńildi baǵdarlama kútedi. Kontsertke QR eńbek sińirgen qaıratkeri Erjan Dáýitov basqaratyn hor men «Astana Opera» Balalar stýdııasynyń hor ártisteri qatysady. Balalar kórermen nazaryn birden tartyp áketetin nómir daıyndady. Munymen qatar kópshilik súıip tyńdaıtyn «Ahaý kerim», «Qusnı-Qorlan», «Aq qýraı» sııaqty qazaq halyq ánderi, dýetter, arııalar, valster jáne kóptegen basqa da nómirler shyrqalady.

Fortepıano partııasyn halyqaralyq konkýrstardyń laýreattary Dolores Úmbetálıeva men Gaýhar Taspergenova, bas kontsertmeıster, halyqaralyq konkýrstardyń laýreaty Elena Sahno, sondaı-aq Aleksandra Egorova men Irına Kýrgýzkına oryndaıdy.