«Astana Opera» teatry Reseıdiń bas sahnasynda jańa balet týyndysyn kórsetti
Talǵampaz kórermen nazaryna sazger Borıs Asafevtiń dramalyq baletiniń biregeı nusqasy usynyldy. Bul spektakldiń tańdalýy kezdeısoq emes – bıyl mýzyka álemi kórnekti horeograf Rostıslav Zaharovtyń týǵanyna 115 jyl tolýyn keńinen atap ótip jatyr. Onyń «Baqshasaraı fontany» - dramalyq balet óneriniń úzdik úlgileriniń biri. Ádebı negizi Aleksandr Pýshkınniń attas poemasynan alynǵan.
Turlyhan Toıǵan Gıreı hannyń rólin somdady. «Astana Opera» baletiniń jetekshi solısi, Qazaqstannyń eńbek sińirgen qaıratkeri Mádına Basbaeva názik Marııanyń partııasyn oryndady. Jalyndy Zaremany balet solısi Anastasııa Zaklınskaıa, Vatslavty Danııar Jumataev, Nuráli rólin Qýat Káribaev oınady.
Solıst Mádına Basbaeva tatarlar tutqyndaǵan názik, jeńil ári ǵashyqtyq sezimi qushaǵyndaǵy polıak qyzynyń beınesin ishki jan dúnıesi arqyly berýge tyrysqanyn aıtty.
«Bul – janyma óte jaqyn partııa, men ony birinshi ret bılep turǵan joqpyn. Kremlde ózimizdiń kásibı sheberligimiz ben qazaqstandyq ártister men «Astana Opera» teatrynyń joǵary deńgeıin kórsete otyryp, Marııanyń partııasyn usynǵanyma óte qýanyshtymyn. Kremlde óner kórsetýimiz bárimizdi qatty tolqytty», - dedi M. Basbaeva.
Máskeýlik kórermen qazaqstandyq ártisterdiń oryndaýshylyq sheberligin ǵana emes, sonymen qatar kórnekti ıtalıandyq sahna sýretshisi Etsıo Frıdjerıonyń talantyn, «Oskar» syılyǵynyń ıegeri, kostıým jónindegi sýretshi Frankı Skýarchapınonyń názik talǵamyn, sondaı-aq jaryqtandyrý jáne proektsııalaý sýretshileri – Vınısıo Kelı jáne Serhıo Metallı sheber paıdalanǵan jańa tehnologııalardy joǵary baǵalady.
«Solıster de, Marııa partııasy da óte tamasha. Bul – álemdik deńgeıdegi solıster. Olardy taǵy basqa da spektaklderden kóremiz degen úmittemin. Trýppanyń deńgeıi óte joǵary.
Atalǵan spektakl osy redaktsııada ondaǵan jyl boıy qoıylmady, ıaǵnı bul – tarıhı oqıǵa. Balet súıetin kórermen úshin óte mańyzdy. «Astana Opera» spektakldi horeografııaǵa degen sondaı baıypty da muqııat qatynaspen oryndady. Sonymen qatar, trýppa men rejıssýranyń joǵary deńgeıiniń arqasynda zamanaýı sıpat aldy. Bul – naǵyz syı jáne Máskeýdiń mádenı ómirindegi aıtýly oqıǵa», - dedi reseılik balet synshysy Marına Talganova.
Bul keshte baletsúıer qaýym qazaqstandyq ártisterdiń shyǵarmashylyǵymen tanysýǵa erekshe múmkindik aldy. Ártister máskeýlik kórermenniń ystyq yqylasy men qoshemetine bólendi.
