«Astana Opera» teatry operalyq jáne balettik stýdııaǵa balalar qabyldaıdy
ASTANA. 22 qańtar. QazAqparat - «Astana Opera» teatrynyń ákimshiligi operalyq jáne balettik stýdııaǵa balalardy qabyldaıdy, dep habarlady mádenıet oshaǵynyń baspasóz qyzmetinen.
«Baletti meńgerýge nıet bildiretinder 8 ben 10 jas, operalyq stýdııanyń úmitkerleri 6 men 15 jas, balalar hory, orkestr, aspaptar ansambline kelem deýshiler 10 men 16 jas aralyǵynda bolýy kerek. Birinshi kezekte mýzykalyq qabiletke jáne mýzykalyq bilimge mán beriledi», - delingen habarlamada.
«Astana Opera» akademııasy balalar stýdııasynyń menedjeri Maııa Beknazardyń atap ótýinshe, teatrdyń operalyq stýdııasy balalar hory men kameralyq orkestrdiń ártisterin daıyndaıdy. «Dáris balalarǵa sahna áleminiń qyr-syryn tolyq tanystyryp, ónerlerin qobaljymaı-aq kórsetýdi, akterlik jáne sheshendik ónerdi, plastıkany meńgerýdi jáne óz áriptesteri - stýdııanyń jas talanttarymen dostasýdy úıretedi. Akterlik sheberlikke ıkemdelýdiń arqasynda adam shyǵarmashylyq erkindigine, árqıly ári tolyqqandy tildesýge jol ashady», - dedi ol.
Bilim alýdyń qosymsha úlgisi bolǵanyna qaramastan stýdııaǵa qatysýshylar kásipqoı ártisterdiń deńgeıine saı kelýge múmkindik beretin daıyndyqtan ótedi.
Balalar tek dáris alyp qoımaıdy. Balalar hory men aspapshylardy jasy úlken ártistermen birge «Astana Opera» teatrynyń operalyq spektaklderiniń qoıylymdary men kontsertterine, sondaı-aq balalardyń jeke spektaklderine qatystyrý josparda bar.
