«Astana Opera» teatry kórermenge «salmaǵy» 30 tonna tartatyn «Aıda» operasyn usynbaq (FOTO)
ASTANA. QazAqparat - 19, 21 jáne 22 qarashada «Astana Opera» jáne «La Skala» kórermen nazaryna Dj. Verdıdiń «Aıda» operasyn usynady.
Operany shyrqaýǵa aty áıgili juldyzdar shaqyrtylǵan. Aıda partııasyn amerıkandyq soprano Krıstın Lıýıs somdaıdy. 2010 jyly ánshi Savonlınna opera festıvalinde «Jyl ártisi» retinde marapattalǵan. «Astana Opera» tórinde Radamesti ıtalıandyq tenor Ýolter Frakkarov shyrqaıdy, ártisti Mılandaǵy «La Skala», Nıý-Iorktegi «Metropolıten-opera», Mıýnhendegi «Bavarııalyq memlekettik opera» jáne basqa álemniń eń bedeldi sahnalary óner kórsetýge jıi shaqyrady. Ekinshi quramda Radamestiń partııasyn Italııadan keletin tenor Gýstavo Porta somdaıdy. Tusaýkeserdiń birinshi kúninde Amanasro partııasyn zamandastarynyń ishindegi eń myqty ánshilerdiń biri, tembrli-keń barıton ıesi Lýka Salsı oryndaıdy, ekinshi kúni sahnaǵa Alberto Gazale (Italııa) shyǵady. Marına Prýdenskaıa (Marıınskıı teatry, Reseı) birinshi quramda Amnerıs partııasyn oınaıdy. Ekinshi quramda bul partııany Ekaterına Gýbanova shyrqaıdy. Bul - ıtalıandyq sýretshi, prodıýser, rejısser, stsenarıst, eki dúrkin «Oskar» syılyǵynyń ıegeri Franko Dzeffırellıdiń qoıylymy. Sondaı-aq «Astana Opera» tóriniń dırıjerlik tizginine teńdesi joq kanadalyq Kerı-Lınn Ýılson alǵash ret ıelik etedi. Qoıylymǵa opera, erler jáne áıelder horynyń solısterinen bastap, balet, orkestr, mımans ártisteri men balalarǵa deıin, shamamen 200 adam qatysady. Qoıylymnyń bar aýqymdylyǵy, birinshi jáne ekinshi aktiler barysynda barlyq ártisterdiń sanaýly mınýt ishinde kostıýmderin, parık jáne grımderin tolyq ózgertip turýy kerektiginde. Kólemdi jáne óte kúrdeli, kóp qatparly ári kóp qabatty dekoratsııalar kóz aldyńda paıda bolyp, áp-sátte joq bolady. Shymyldyqtyń artynda qyzmet kórsetetin mamandar sany sahnaǵa shyǵatyn ártistermen birdeı ekenin aıtýdyń ózi artyq shyǵar. «Tańǵajaıyp dekoratsııalar men ár kıimge áshekeı, beldik, jamylǵy, býtaforııa sııaqty 10-15 buıym tıesili 400 astam kostıýmderdi Qazaqstanǵa jetkizý úshin 17 úlken júk kóligi kerek bolǵan. Kórermen sahnadan tamashalaıtyn barlyq zattyń jalpy salmaǵy 30 tonnany quraıdy», delingen «Astana Opera» teatrynyń habarlamasynda.
