«Astana Opera» teatry kameralyq zalynyń úshinshi maýsymyn «Án - halyqtyń ajary» kontserti aıaqtaıdy
ASTANA. QazAqparat - 30 maýsymda «Astana Opera» teatrynyń kameralyq zal sahnasynda «Án - halyqtyń ajary» atty kontsert ótedi.
Teatrdyń baspasóz qyzmetiniń habarlaýynsha, óner keshine «Astana Opera» solısteri -halyqaralyq baıqaýlardyń laýreattary Roza Nurkeı (soprano), Gúljanat Sapaqova (metstso-soprano), Ramzat Balakıshıev (tenor) jáne Qazaqstannyń eńbek sińirgen qaıratkeri Janat Shybyqpaev (barıton) qatysady. Fortepıano partııasynda - Merýert Jekenova men Irına Kýrgýzkına.
«Bul kontsertpen biz Kameralyq zaldyń úshinshi maýsymyn jabamyz. Áıtse de, jazǵy kezeńde jeti kontsert óteıin dep otyr (shildeniń 20-nan 30 deıin, tamyzdyń 14-nen 24 deıin). Baǵdarlamalar san túrli ári qyzyqty bolady. Maýsymdy aıaqtaıtyn kontsert «Án - halyqtyń ajary» dep atalady. Keshte Qazaqstan halyqtary ánderimen qatar, álem halyqtarynyń ánderi shyrqalady. Kórermendi jarqyn, qyzyqty, jazǵa saı ásem baǵdarlama kútip tur», - deıdi Kameralyq zaldyń jetekshisi, mýzykatanýshy Marjan Jákenova.
Popýrrıge engen qazaqtyń belgili halyq ánderi, tájiktiń halyq áni «Mýhabbat», ýkraın halyq ánderi «Nıchıaka misıachna», «Vechor», orystyń halyq áni «Pod dýgoı kolokolchık» jáne basqasymen birge, Dj. Verdı, Dj. Rossını, F. Legara sııaqty kórnekti operalyq kompozıtorlardyń operettalary men operalarynan tanymal klassıkalyq shyǵarmalar: romanstar, dýetter oryndalady.
