«Astana Opera» teatry HH ǵasyrdyń hıttaryn oryndaıdy
ASTANA. QazAqparat - 19 maýsymda «Astana Opera» Kameralyq zalynda buryn ár úı, aýla, kóshe jáne alańdarda, teledıdar ekrandarynda oryndalatyn, olar barlyq meıramdar men is-sharalarda shyrqalatyn «HH ǵasyr hıttary» tyńdaýǵa bolady, dep habarlaıdy teatrdyń baspasóz qyzmeti.
Elordalyq tyńdarmanǵa M. Tarıverdıev, A. Zatsepın, N. Bogoslovskıı, T. Hrennıkov, E. Kolmanovskıı, A. Pahmýtova, E. Martynov, E. Krylatov sııaqty áıgili avtorlardyń mýzykalyq shyǵarmalary men kópshilik súıip tyńdaıtyn Sh. Qaldaıaqovtyń «Ana týraly jyr», «Aqerke Aqjaıyq», T. Taıbekovtyń «Jas daýren» jáne taǵy basqalary usynylady.
Kontsertti uıymdastyrýshy Elena Sahno, ózimen birge qyzmet jasaıtyn solısterdiń barlyǵy birdeı óz aldyna dara tulǵa ekendigin atap ótti. Vokalısterdiń esimi tek Qazaqstanda ǵana emes, odan tys jerlerde de jaqsy tanymal. Olardyń qatysýymen ótetin túrli janrdaǵy jarqyraǵan jáne áserli mýzykalyq keshter úlken suranysqa ıe.
Keshte Qazaqstannyń eńbek sińirgen ártisi Jannat Baqtaı, Qazaqstannyń eńbek sińirgen qaıratkerleri Dına Hamzına, Saltanat Ahmetova, Súndet Baıǵojın, Jan Tápın, halyqaralyq baıqaýlardyń laýreattary Talǵat Ǵaleev, Evgenıı Chaınıkovtyń daýystary tyńdarmandy shattyqqa bóleıdi.
Odan basqa Kameralyq zal sahnasynda óner kórsetetin talantty aspapshylar - Kırıll Krasıýkov, Narǵyz Erejepova (skrıpkalar), Janar Ahatova (alt), Kýrvanjan Ahatov (vıolonchel), Aleksandr Malınovskıı (týba), Marat Omarov (soqpaly), sonymen qatar «Astana Opera» Balalar hory (jetekshisi - Altynǵanym Ahmetova). Fortepıano partııasynda - halyqaralyq baıqaýlardyń dıplomanty, «Mádenıet qaıratkeri» Elena Sahno.
- Tabysty kontserttik baǵdarlama jasaýdyń syry - bul, eń aldymen, mýzykaǵa degen mahabbat. Oryndaýshylar meniń barlyq bastamalarymdy yntamen qoldap, ıdeıalaryn aıtady, baǵdarlamany qalyptastyrýǵa usynystar engizedi. Sodan keıin, birlesip nota materıaldaryn izdeımiz, óńdeımiz, jańa repertýardy úırenemiz. Ártister úshin eń bastysy - ystyq yqylasty seziný, kórermenniń júzinen qýanysh kórý. Mine osy úshin biz ómir súrip, qyzmet jasaımyz. Zaldardyń lyq tolýy - ánshi úshin eń úlken marapat. Árkez mýzykanttar kórermendi qaıtalanbas jáne umytylmas jańa nómirlermen tań qaldyrǵylary keledi, - dedi Elena Sahno.
