«Astana Opera» teatry elordalyq oqýshylarǵa ekskýrsııa ótkizýde
ASTANA. 13 qarasha. QazAqparat - «Astana Opera» teatry Astana qalasynyń 5-10 synyp aralyǵyndaǵy oqýshylarǵa tegin ekskýrsııa ótkizýde, dep habarlaıdy QR Mádenıet jáne aqparat mınıstrliginiń baspasóz qyzmetinen.
Balalar jańa óner shańyraǵymen tanysyp, sahna syrtyn tamashalap, úlken qozǵalys mehanızmine kóz jetkizip, teatrdyń murajaıy men kameralyq zalyn kóre alady. Teatr ákimshiligi orta mektep oqýshylarynyń teatrda ózderin qalaı ustaıtyny jóninde ereje ázirledi.
Alǵashqy bolyp «Astana Operany» 4 qarashada 59 mektep oqýshylary tamashalady. Balalar Reseıdiń Úlken teatrynan ákelingen eksponattardy qyzyǵýshylyqpen qarap shyqty. Oqýshylarǵa jańa Óner shańyraǵynyń basty zaly kórsetilip, sol jerde olar bir-eki notany daýysqa salyp ta kórdi, al teatrdyń kameralyq zalynda oqýshylar frantsýz jáne ıtalıandyq sheberleriniń sýretterin tamashalady.
«Astana Opera» teatrynyń dırektory Tólegen Muhamedjanov oqýshylarǵa tegin ekskýrsııa uıymdastyrý jobasyn júzege asyrýdyń negizinde jas qazaqstandyqtardy tárbıelep, óskeleń urpaqtyń boıynda mádenı, etıkalyq jáne estetıkalyq qundylyqty qalyptastyrý jatqanyn atap ótti.
Ekskýrsııa seısenbi men jeksenbi aralyǵynda júredi. Atalǵan kúnderde ekskýrsııa kúnine eki ret ótedi jáne ár top 40 adamnan quralady. Jumys ýaqyty: 11.00 -12.30, 15.00-16.00.
Kólik shyǵyny men balalardy teatrǵa jetkizýdi Astana qalasy bilim basqarmasy óz jaýapkershiligine aldy. Bolashaqta teatr mundaı ekskýrsııany nıet bildirgen Respýblıka oqýshylaryna da ótkizedi.
