«Astana Opera» teatry Don Kıhot baletin qoıýǵa daıyndalýda
ASTANA. QazAqparat - «Astana Opera» teatrynyń tórtinshi maýsymy L. Mınkýstyń «Don Kıhot» baletiniń tusaýkeserimen bastalyp, qala qonaqtary men turǵyndaryn qýanyshqa bólemekshi, dep habarlaıdy teatrdyń baspasóz qyzmeti.
Baletti qoıýshy baletmeıster - Reseıdiń halyq ártisi, «Astana Opera» balettik trýppasynyń kórkemdik jetekshisi Altynaı Asylmuratova.
Jarqyraǵan, ázil men qushtarlyqqa toly balettiń adamdy qýanyshqa bóleıtin satırasy men sarqylmaıtyn qýaty nazarymyzdy, ıspandyq jazýshy Mıgel de Servantestiń mańyzyn joımaıtyn álemdik ádebıettegi eń tanymal shyǵarmalarynyń biri «Lamanchalyq aılaker ıdalgo Don Kıhot» romanyna aýdartady.
Alaıda balettiń romannan aıyrmashylyǵy - basty nazarda, romandaǵydaı, qaıǵyly beınedegi rytsar Don Kıhot emes, traktırshiniń qyzy Kıtrı men shashtaraz Bazıldiń mahabbaty jaıly oqıǵa. Rytsardiń el kezbeliginiń arqasynda keıipkerler ómirdiń qıyndyqtaryn jeńip, nekelesedi. Bul spektaklde mahabbat oqıǵasy qııal men armanǵa jıi aýysyp otyrady. Don Kıhottyń súıiktisi Dýlsıneıamen (Kıtrı) dýeti dramalyq aıqyndylyqty jáne keıipkerlerdiń sıpatyn ashyp kórsetedi. Kıtrıdiń róli asyra siltelmegen, oǵan erekshe maǵynaly jaýapkershilik artylǵan - erjúrek rytsar Don Kıhottyń jalǵan álemimen salystyrǵanda, jeńiltek ári ushqalaq, kóńildi boıjetken shynaıy álemniń beınesine aınalady.
«Bıyl «Don Kıhot» baletine 147 jyl tolady. Balettiń uzaq jyl mańyzyn joımaýynyń qupııasy - kúlkili qyrlary men sezimge tolylyǵynda. Asqaqtaǵan syǵan bıleri, Don Kıhottyń túsine enetin ǵajaıyp drıadalar, bir jarym ǵasyr boıy kórermendi jalyqtyrmaı keledi. Men Aleksandr Gorskııdiń óńdeýin negizge aldym, spektakl eki bólimnen turady. Syǵan bıi ózgertiledi, bul joly qımyl-qozǵalys artatynyna úmittenemin. Er solıstterdiń sany da kóbeıtiledi. Bul joly kórermen toreador Espadanyń bıshimen dýetin burynǵydaı kabakta emes, úılený toıy kórinisinde tamashalaıdy. Birinshi perdede keıipker klassıkalyq bıshi retinde shyqsa, keıin ózgeshelenedi», - deıdi Altynaı Asylmuratova.
«Astana Opera» teatrynyń barlyq jetekshi solısteri men solısteri basty partııalarda baq synap kóretindigi belgili. Olardyń kópshiligi bul spektaklde óner kórsetkendikten, tájirıbeleri bar. Máselen, Qazaqstannyń eńbek sińirgen qaıratkerleri Gaýhar Ýsına, Madına Baspaeva Kıtrı rólin túrli sahnalarda birneshe ret somdady.
«Jetekshi bıshilermen qıyndyq joq, al negizgi partııalardaǵy - qııalshyl Don Kıhot, Sancho Pansa, baı Gamashpen - jaqsylap jumys isteýge týra keledi. Barlyq keıipkerler kórnekti, beıneli bolýy kerek. Óte mańyzdy obraz bolyp tabylatyn dvorıan Gamashqa qarap, birinshi bólimniń sátti ekenin aıtýǵa bolady. Eger, birinshi bólimde beıne ashylmasa, birinshi bólimdi joq deı berińiz. Meniń qandaı da bir «qyzyqty aılalar» oılap tapqym keledi, alaıda barlyǵy óte joǵary talǵammen jasalýy kerek. Kórermen Barselonanyń qaınaǵan ómirinen kórinis tamashalaı alady, sahnanyń ár jerinde, ár buryshynda ómir qaınap jatady. Sonymen qatar, spektaklge mindetti túrde balalar da qatysady», - deıdi balet trýppasynyń kórkemdik jetekshisi Altynaı Asylmuratova.
Kostıýmder men dekoratsııalardy elorda halqyna belgili ıtalıandyq sheberler - «Oskar» syılyǵynyń ıegeri Franka Skýarchapıno men Etsıo Frıdjerıo daıyndaıdy.
Spektakl bıyl kúzde 28-29 qazanda qoıylady.
