«Astana Opera» teatry bıletterdi onlaın sata bastady
ASTANA. QazAqparat - Búgin «Astana Opera» teatry bıletti satýdyń elektrondyq júıesin iske qosty. Bıletter saýdaǵa bılettik operator Biletbar.kz arqyly túsedi, bıletti satý jónindegi vıdjet teatrdyń saıtynda ornalasady. Kassadan jáne Ǵalamtor arqyly satyp alynǵan bıletterdiń baǵasy birdeı. Bıletti satý erejesi burynǵysha: bılet aıyrbastalmaıdy jáne keri qabyldanbaıdy.
Bıletti satý júıesi ashyq túrde júrgiziledi. Satylǵan ár bılet júıede tirkeletindikten ony óz kúshińmen nemese baǵdarlama arqyly óshirý jáne ózgertý múmkin emes. Sondaı-aq bıletti qoldan jasaýdan qorǵaýǵa mán berildi. Ár bılet orny, qatary, qalaı jáne qaı ýaqytta alynǵany jaıly satyp alý deregi bar QR kodpen qamtylǵan. Zalǵa kirgende osy kod arnaıy quraldyń kómegimen skannan ótkiziledi de aqparat oqylady, osylaısha bılet tekserýden ótedi. Smartfony jáne planshettik qurylǵysy bar adamǵa bıletti basyp shyǵarýdyń qajeti joq, sebebi endi elektrondyq bılet optsııasy iske qosyldy. Sharaǵa keler aldynda QR kodty gadjette saqtaý kerek, kirerde sony bılettiń ornyna kórsete salasyz.
