«Astana Opera» teatrynda Ulttyq dombyra kúnine oraı kórme ashyldy
ASTANA. KAZINFORM — «Astana Opera» memlekettik opera jáne balet teatrynda Ulttyq dombyra kúnine oraı «Basty rólde – Dombyra» atty taqyryptyq kórme ashyldy.
Ekspozıtsııa teatrdyń foıesine qoıyldy. Ony osy kúnderi qoıylymǵa kelgen kórermender men teatrǵa ekskýrsııa jasaǵan qonaqtar tamashalaı alady.
Kórme teatr shyǵarmashylyǵyndaǵy dombyranyń mańyzyn aıshyqtaıdy.
Beınematerıaldar men muraǵattaǵy qujattar dombyranyń teatr ónerindegi orny men qazaqtyń dástúrli mýzykalyq murasyn dáripteýdegi mánin kópshilikke keńinen tanystyrady.
«Astana Opera» teatrynyń repertýaryndaǵy qazaqtyń klassıkalyq mýzykasy men tarıhı taqyryptarǵa qurylǵan ulttyq qoıylymdarynda dombyranyń úni erekshe oryn alady.
Solardyń qatarynda Ahmet Jubanov pen Latıf Hamıdıdiń «Abaı», Evgenıı Brýsılovskııdiń «Qyz Jibek», Muqan Tólebaevtyń «Birjan – Sara» operalary jáne ózge de qoıylymdar bar. Bul týyndylarda dombyra keıipkerlerdiń bolmysyn ashyp, dáýir tynysyn sezindirip, sahnadaǵy oqıǵany ulttyq rýhpen sabaqtastyrady.
Aıta ketelik Ulttyq dombyra kúnine oraı Qazaqstanda 2000-nan astam mádenı is-shara ótedi.
