«Astana Opera» teatrynda Ermek Serkebaevtyń 100 jyldyǵyna arnalǵan kontsertter legi bastaldy
ASTANA. KAZINFORM – «Astana Opera» teatrynyń Kúlásh Baıseıtova atyndaǵy Kameralyq zalynda kórnekti qazaqstandyq barıton, ulaǵatty ustaz Ermek Serkebaevtyń týǵanyna 100 jyl tolýyna arnalǵan «Óner tarlandary» toptamasynyń alǵashqy kontserti ótti.
Keshtiń shymyldyǵyn ashqan Qazaqstannyń Halyq ártisi, Memlekettik syılyqtyń laýreaty Shahımardan Ábilov uly ánshiniń álemdik mýzyka tarıhyndaǵy ornyna toqtaldy.
– Búgingi kontserttiń ereksheligi – bizdiń án ónerimizdiń, qazaq tili men tarıhynyń álemdik deńgeıdegi bıigin kórsetýinde. Sultanmahmut Toraıǵyrov aıtqandaı «halyqtyń áni ketse, ádebıeti jesir qalady, sáni ketedi, sáni ketse, jany ketedi». Ermek aǵamyz – álemdik deńgeıdegi Karýzo, Tıtta Rýffo, Shalıapın sekildi alyptarmen terezesi teń turǵan, júz jylda bir keletin biregeı qubylys. Onyń daýysy men ıntonatsııasy arqyly kúlli álem qazaq tiliniń qudiretin tanydy, – dedi Sh. Ábilov.
Joba avtory ári kontsertmeıster, Qazaqstannyń eńbek sińirgen qaıratkeri Raýshan Beskembırova baǵdarlamany jasaý barysynda Ermek Serkebaevtyń san qyrly talantyn ashýdy kózdegenin aıtady.
Keshte halyq ánderimen qatar, klassıkalyq orys romanstary men otandyq kompozıtorlardyń týyndylary shyrqaldy.
– Ermek Bekmuhameduly óte meıirimdi, parasatty jan edi. Ol tek uly ánshi ǵana emes, aspapty da sheber meńgergen has mýzykant bolatyn. Biz búgingi jas oryndaýshylar arqyly Serkebaev salǵan sara joldy, onyń ózindik traktovkasyn kórermenge jetkizýge tyrystyq, – dep atap ótti Raýshan Beskembırova.
Sahna tórinde Talǵat Musabaev, Aıgúl Nııazova, Jan Tapın sekildi belgili maıtalmandarmen birge Ferýza Rahmetova, Leıla Alamanova syndy jas talanttar óner kórsetti. Barlyǵy 23 shyǵarma oryndalyp, árbir týyndy kórermenniń ystyq yqylasyna bólendi.
Aıta keteıik, buǵan deıin «Astana Operada» eston mýzykasynyń kontserti ótkenin habarlaǵan edik.