«Astana Opera» «Teatrdyń ómirge kelýi» atty úlken gala-kontsert ótkizedi
ASTANA. 9 qazan. QazAqparat - 24 qazan kúni «Astana Opera» memlekettik opera jáne balet teatry «Teatrdyń ómirge kelýi» atty úlken gala-kontsert ótkizedi, dep habarlady mádenı oshaqtyń baspasóz qyzmetinen.
Áserli beıne paıdalanylatyn teatrlandyrylǵan shoý kórermendi álemniń paıda bolǵan shaǵyna jetelep, búgingi kúnge qaıta ákeledi. Kórermen jańa úlgide dúnıege kelgen álemdik mýzykalyq teatr jaýharlarymen tanysady. Bul kúni álemge áıgili klassıkalyq shyǵarmalarmen qatar buǵan deıin Qazaqstanda eshqashan oryndalmaǵan mýzyka shyrqalady. «Biz ómirge kelgen teatrdy kórsetemiz jáne osy oqıǵanyń kýási bolyp tabylamyz», - deıdi «ASTANA OPERA» teatry operalyq trýppasynyń kórkemdik jetekshisi, Tatarstan Respýblıkasynyń Eńbek sińirgen óner qaıratkeri Gózel Haıbýlına.
Sondaı-aq kesh baǵdarlamasynda ulttyq repertýardan da shyǵarmalar oryndalady.
Kontsertte teatrdyń shyǵarmashylyq elıtasy óner kórsetedi. Olar: Medet Shotabaı, Jannat Baqtaı, Aıgúl Nııazova, Álfııa Kárimova, Gúlzat Daýyrbaeva, Dına Hamzına, Talǵat Musabaev, Súndet Baıǵojın jáne basqalary.
Sonymen qatar gala-kontsertke teatrdyń úzdik spektaklderiniń jarqyn kórinisterinen biregeı balet shoýyn ázirlegen «Astana Opera» baletiniń juldyzdary qatysady.
Kesh boıy Qazaqstan Respýblıkasynyń eńbek sińirgen qaıratkeri Abzal Muhıtdınovtyń basqarýymen «ASTANA OPERA» sımfonııalyq orkestriniń oryndaýyndaǵy mýzyka oryndalady.
