«Astana Opera» teatr maýsymyn aıaqtaıdy (FOTO)
ASTANA. QazAqparat - «Astana Opera» teatrynyń úshinshi maýsymy eki bólimnen turatyn gala-kontsertpen jabylady. 16 shildede Úlken zal sahnasynda L. Mınkýs pen E. Deldevezdiń "Pahıta" baletinen jarqyraǵan Gran-panyń tusaýy kesiledi.
Teatr súıer qaýym "Trılbı", "Kandavl patsha", "Qanatty at", "Sılfıda", M. Fokınniń "Armıda pavılony" sııaqty eski baletterden turatyn eń tartymdy varıatsııalar sherýin tamashalaıdy. Árbir solıstke kópshilik aldynda óziniń barlyq ártistik sheberligin pash etetin múmkindik usynylady, dep habarlaıdy elorda ákimdiginiń resmı saıty.
«Búginde «Astana Opera» balettik trýppasy belsendi damyp keledi, men soǵan qýanyshtymyn. Teatrdyń úshinshi maýsymynda biz úlken jumys atqardyq: L. Mınkýstyń orasan zor "Baıaderka" klassıkalyq spektakliniń tusaýy kesildi, mazmundy Gala-balet baǵdarlamasy quryldy. Jaqynda ǵana HH ǵasyr horeografııasynyń úzdik týyndysy - R. Petıdiń "Parıj Qudaı Anasynyń soboryn" usyndyq. Tehnıkalyq jaǵynan kúrdeli bul balet biregeı stıldik mánerimen erekshelenedi, munda kordebaletke basa nazar aýdarylǵan. Biz munymen toqtamaımyz jáne aıtarlyqtaı nátıjege qol jetkizemiz», - deıdi «Astana Opera» balettik trýppasynyń kórkemdik jetekshisi, Reseı halyq ártisi Altynaı Asylmuratova.
Teatrdyń jetekshi solısteri álemdik klassıkalyq opera jaýharlaryn oryndaıdy. Sonymen qatar, tyńdarman súıip tyńdaıtyn otandyq mýzyka týyndylary shyrqalady.
