«Astana Opera» sımfonııalyq orkestri Marıınskıı teatrynda óner kórsetti
MÁSKEÝ. QazAqparat - Sankt-Peterborda Marıınskıı teatrynyń zalynda Reseıdiń halyq ártisi Valerıı Gergıevtiń basshylyǵymen «Astana Opera» Memlekettik opera jáne balet teatrynyń sımfonııalyq orkestri óner kórsetti.
Bul týraly Reseı Federatsııasyndaǵy Qazaqstan Respýblıkasynyń Elshiliginen habarlady.
Baǵdarlamada qazaq, orys jáne batyseýropalyq kompozıtorlardyń shyǵarmalary oryndaldy. Onyń ishinde E.Rahmadıevtiń «Qudasha dýman» sımfonııalyq kúıi, T.Kajyǵalıevtiń «Dala ańyzy» baletinen sıýıta, ıA.Sıbelıýs orkestrimen skrıpka úshin kontsert jáne S.Prokofevtiń «Romeo jáne Djýletta» baletinen eki sıýıta bar. Sıbelıýs kontsertinde jeke partııany qazaqstandyq skrıpkashy Erjan Qulybaev oryndady.
Bul maestronyń Marıınskıı teatrynda sımfonııalyq kontsert formatynda ótken «Astana Opera» ujymymen birlesken alǵashqy shyǵarmashylyq keshi boldy.
2014 jyldan Valerıı Gergıev «Astana Opera» teatrymen yntymaqtasyp keledi.
