«Astana Opera» sahnasyndaǵy jumys men úshin jańa beles - ánshi Alfııa Kárimova

Ol úshin úlken óner, úlken sport sııaqty. Jańa jeńister men jetistikter tek tabandy eńbek pen óz isińe shynaıy berilgendikten ǵana týyndaıdy. «Rejısserlyq teatr» men XXI ǵasyr spektakldegi mindetterdi keńeıtip operalyq ártisterge degen talaptarǵa aıtarlyqtaı ózgerister engizdi. Taldyrmash deneli operalyq ánshi búgingi kúngi opera sahnasyndaǵy ónerdiń qyr-syrymen bólisti.

-«Astana Operadaǵy» jumystan ne kútesiz?
-Shalqyǵan áýen, kóptegen jańa kezdesýler, al men úshin eń bastysy - menimen burynan tanys astanalyq kórermenmen qaýyshý. Men Astanada ártúrli kontsertterde án aıtqam, baıqaýlarǵa qatysqam, atap aıtqanda Bıbigúl Tólegenova atyndaǵy baıqaýda óner kórsetip, Gran-pı utyp alǵam. Men úshin «Astana Opera» sahnasynda jumys isteý úlken qurmet, maqtanysh. Endi bul meniń de teatrym ekenin oılasam keýdemdi maqtanysh sezimi bıleıdi.
- Sizdiń oıyńyzsha ómirińizdegi eń úlken jetistigińiz qaısysy?
- Meniń oıymsha, jetistikterim, shyǵar belesim áli alda sııaqty. Kezekti jeńisti oı eleginen ótkizý úshin maǵan bir-eki kún jetkilikti, sosyn jańa belesterge umtylamyn. Men 29 ártúrli baıqaýǵa qatystym, olardyń ishinde tabystylary da, áttegen-aı degizgen keleńsiz sátteri de boldy. Qıyndyqtyń adamdy shyndaı beretini belgili ǵoı, men úshin olardyń bári tálimdi tájirıbe.
- Ónerińizdi qasterleıtinder kóp pe?
- Olar Reseıde de, Qazaqstanda da óte kóp. Birde Eýropada qyzyq jaǵdaı boldy. Meni tórt ret Ispanııaǵa, Ibıtsaǵa shaqyrdy. Bul bıdi súıetinderdiń jınalatyn orny, sonymen birge munda klassıkalyq mýzykanyń halyqaralyq festıvali ótip turady, munda ánshiler, mýzykanttar, orkestrler, ansamblder bas qosady. Meniń de osynda óz kórermenim bar. Osyndaı kezekti jeke kontsertten keıin men Barselonaǵa ushpaqshy boldym. Pasporttyq baqylaýdan ótip, otyrǵyzýdy kútip otyrǵanmyn. Kenet jolaýshylardy ushaqqa jiberip turǵan áıel maǵan qujatymdy kórsetýimdi ótindi. Men bolsam, taǵy ne bolyp qaldy eken degen oıda boldym, al ol meniń qujatymdy kórip, Siz Alfııa Kárimovasyz! Keshe men sizdiń kontsertińizde boldym dep jar saldy, maqtanyshpen. Osyndaı sátterde keýdemdi qýanysh sezimi sergitedi.
- Operalyq ánshi jolyn tańdaýǵa uıtqy bolǵan kim?
- Meniń turaqty qoldaýshym, anam. Ol kisi bıshi bolýdy, nemese mýzykalyq maman ıesi bolýdy armandapty, biraq taǵdyr til mamany bolýdy jazypty. Meniń anam óte zııaly, bizdiń teatrlarymyzdyń repertýaryn jatqa biledi. Álemdik mýzykalyq mádenıetten habardar, «Travıata» operasynan Vıolettanyń arııasyn oryndap bere alady, operalyq klassıkalyq ónerdi janyndaı jaqsy kóredi. Árıne anamnyń yqpaly zor boldy. Ol kisi meniń qandaı da bir salaǵa kóńil bólýime nemese qalaýyma aralaspady, osy úshin anama óte rızamyn. Toǵyz jasymda kásiptik mýzykamen tııanaqty aınalysa bastaǵanymda, meni qoldady, aqylyn aıtty. Birinshi armanym, balerına bolý bolatyn, horeografııalyq ýchılışege kelip edik, qańtar aıynda kelińder dedi, biraq keıinen men mýzykalyq mektepte fortopıanada oınaýdy úırengim keletindigin aıttym.
Men ony pıanıst retinde bitirdim, sosyn Ýfadaǵy ýchılışeni dırıjer retinde bitirdim, sosyn óner ınstıtýtyn támamdadym. Ekinshi kýrsta oqyp júrgende meni operalyq teatrǵa ánshi retinde shaqyrdy, bul óte jaýapty, ári qyzyqty sátter boldy. Maǵan osyndaı múmkindik bergen adamdarǵa meniń alǵysym sheksiz. Bul alǵashqy qadamdardyń meniń úlken ánshi bolyp qalyptasýyma tıgizgen paıdasy zor.
- Sizdiń oıyńyzsha mansap pen otbasyn bir arnaǵa toǵystyrýǵa bola ma?
- Men úılestire aldym. Meniń ulym úsh jarym jasta. Joldasym da óner adamy, Abaı atyndaǵy MAOBT ánshisi Bolat Jomartov. Balamnyń aty Nursultan. Eger ulymyz ánshilikti tańdasa biz qoldaımyz dep oılaımyn. Bizdiń kásibimizde bireýdiń nusqaýmen, kúshteýimen jetistikke jete almaısyń. Tek kómektesý qajet. Otbasy men úshin shabyt alatyn, kúsh alatyn qasıetti oshaq.
- Shabyt degen uǵymdy qalaı túsinesiz?
- Shabytty ómirden alamyn. Meniń sahnadaǵy amplýam - súıikti áıel bolyp qalyptasty. Keıde dramatıkalyq rólderdi de somdaımyn. Ómir tek mahabbattan, jeńisten turmaıdy ǵoı, árıne joǵaltasyń. Ómirde árkim óz isimen aınalysýy kerek dep sanaımyn. Keıde jumys barysynda ártúrli jaǵdaılar bolady ǵoı, osyndaı pikirdiń áralýandyǵynan tamasha oılar týyndaıdy.
- Shyǵarmashylyq adamy retinde, ómirde Sizdi renjitetin usaq-túıek jaıttar bola ma?
- Men emotsıonaldy, kez-kelgen nárseni kóńilime jaqyn qabyldaıtyn adammyn. Biraq mamandyǵymyz tek sezimtaldyqty ǵana emes, qorǵana bilýdi de talap etedi. Qolda bardy ýysyńda ustaı bilý úshin ótkir minez de artyq bolmaıdy. Meniń oıymsha, adam qashan da qarapaıym bolý kerek, eshkimge jamandyq jasamaý, shamań kelgenshe jaqsylyq jasaý ómirde asa mańyzdy.
- Daýys jaqsy shyǵýy úshin arnaıy dıeta ustaý kerek pe?
- Eger bári azyq-túlikpen sheshiletin bolsa, bári ánshi bolyp keter edi, bul árıne eńbek. Men eseıgen saıyn, óz áriptesterimdi tereń tanyǵan saıyn, shamaly daýyspen, erinbeı eńbek etseń úlken jetistikterge jetýge bolatyndyǵyna kózim jetti. Ol úshin árıne jumysyńdy jan-tánińmen súıip, talmaı izdený kerek.
- Kóp kúsh jumsaýmen este qalǵan baıqaý?
- Ár baıqaýdyń óz erekshelikteri bar. Alǵashqy jarystarda men oǵan asa mán bermedim, kele kele, munyń óte úlken jaýapkershilik ekenin uqtym. Degenińe jetý úshin talaı ter tógý kerek ekendigin uqtym. Sonda ǵana san sapaǵa aınalady.
- Shyǵarmashylyq josparyńyz týraly ne aıtasyz?
- «Astana Opera» trýppasynan laıyqty oryn alý, jańa spektaklderge, qoıylymdarda ónegeli óner kórsetý.
- Qalaı demalasyz? Kóńilińizdiń qalaýy ne?
- Monshany jaqsy kóremin. Fıtnes klýbtarda jıi bolamyn. Sporttyń adam aǵzasyna bereri kóp. Ioga da meniń kúndelikti turmysymnan óz ornyn alǵan. Adamnyń denesi tartylyp, sulýlanǵan saıyn, ishki dúnıesi de ajarlana túsetinin bárimiz bilemiz.
- Teatrǵa, endi Sizdiń teatryńyzǵa aıtar jyly tilegińiz.
- Kórermen kóptep kelse eken deımin. Halyq opera men baleti súıgenin qalaımyn. Óz áriptesterime shyǵarmashylyq tabys tileımin. Teatrdyń arhıtektýrasynda tarıh pen ulttyq sıpat ábden úılesin tapqan. Meniń oıymsha, ánshiler men mýzykanttar sahnada ózderin jaqsy sezinýi úshin barlyq jaǵdaı jasalǵan.