«Astana Opera» sahnasynda jas mýzykanttar alǵashqy jeke kontsertin ótkizedi
ASTANA. QazAqparat - «Kvıkonte» kvınteti 21 aqpanda «Astana Opera» Kameralyq zalynda alǵash ret jeke kóntsert beredi, dep habarlaıdy teatrdyń baspasóz qyzmeti.
Ujymnyń shyǵarmashylyq qyzmetiniń negizi, teatrdyń Kameralyq zalynyń túrli kontsertine qatysý bolyp tabylady. «Jeńil lep» atty kontsertte qazaq, orys jáne shetel kompozıtor-klassıkteriniń týyndylary usynylady.
«Kvıkonte» ujymy aıtarlyqtaı jas, oǵan áli tórt jyl da bolǵan joq, biraq onyń quramyndaǵy mýzykanttar - shyǵarmashylyq jaǵynan tolyq jetilgen tulǵalar, kásibı aspapshylar. Olardyń barlyǵy - Alekseı Kosyrev (fleıta), Dámılıa Máhpirova (goboı), Almas Toqpanov (klarnet), Áset Neldibaev (fagot), Marat Qonyspaev (valtorna) joǵary marapat ıegeri, kóptegen halyqaralyq baıqaýlardyń jeńimpazy. Kvıntettiń búkil repertýaryn súıip tyńdaıtyn óz tabynýshylary bar.
Keshte aspapshylarmen birge óner kórsetetin olardyń vokalıst-áriptesteri: teatrdyń jetekshi solıstteri, opera sahnasynyń juldyzdary - Qazaqstannyń eńbek sińirgen qaıratkeri Dına Hamzına, Gúljanat Sapaqova jáne Tatıana Vıtsınskaıa (metstso-soprano); Qazaqstannyń eńbek sińirgen qaıratkeri Talǵat Musabaev (barıton).
Ansambl mýzyka klassıkteri men qazirgi avtorlardyń da shyǵarmasyn usynady. Baǵdarlama jóninde «Astana Opera» Sımfonııalyq orkestri fleıta tobynyń kontsertmeısteri Alekseı Kosyrev tolyǵyraq áńgimelep berdi.
- Bul kvıntettiń «Astana Opera» sahnasyndaǵy alǵashqy jeke kontserti. Biz qatty qobaljýdamyz, óıtkeni tańdalǵan shyǵarmalardy oryndaý aıtarlyqtaı kúrdeli. Kórermen nazaryna ansamblge arnaıy jazylǵan týyndylardyń túpnusqalary ǵana emes, kvıntettiń oryndaýyna qyzyqty etip salynǵan tanymal orkestrlik pesalar men operalyq arııalar da usynylady. Kontsert baǵdarlamasy asa muqııat tańdaldy. Keshti E. Grıgtiń áıgili «Taý koroliniń úńgirinde» týyndysy ashady. Baǵdarlamada sonymen qatar solıstter oryndaıtyn J. Bızeniń "Karmen" operasynan sıýıta bar, óıtkeni operadaǵy basty keıipker Karmenniń daýysy metstso-soprano, bul partııany úsh metstso kezekpen oryndaıdy, al olarmen birge sahnada barıton Toreador boı kórsetedi. Kvıntetke salynǵan «Nemorıno» romansy oryndalady. Sondaı-aq biz tyńdarmanǵa D. Lıgetıdiń áserli, ádemi, deı turǵanmen kúrdeli «Іshekti aspaptar kvıntetine arnalǵan alty bagatel» shyǵarmasyn usynamyz. Biz munymen shektelmeımiz: kórermendi mýzykalyq tosyn syı kútedi, - dedi Alekseı Kosyrev.
Elordalyq tyńdarman nazaryna usynylatyn taǵy bir tosyn syıdyń biri - Baqtııar Qusaıynovtyń «Serýen» atty qazaqtyń aspapty shyǵarmasynyń tusaýkeseri.
