Astana Opera sahnasynda «Máńgi óshpes mýzyka» shyrqalady

Teatrdyń Sımfonııalyq orkestri Reseıdiń eńbek sińirgen ártisi, tanymal dırıjer Aleksandr Tıtovtyń (Sankt-Peterbor) jetekshiligimen óner kórsetedi.  Solıst - belgili skrıpkashy, Qazaqstannyń eńbek sińirgen qaıratkeri Baǵdat Ábilhanov.

Halyqaralyq sahnada Qazaqstannyń betke ustar týyndysyna aınalǵan T.Qajyǵalıevtiń «Dala ańyzy» sıýıtasynan «Qyz qýý»  sımfonııalyq skertsosymen kontserttik baǵdarlama ashylady. Keremet boıaýlar men kúsh-jigerge toly tamasha pesa túrli el tyńdarmandarynyń júregin  zamanaýı stıl men tereń ulttyq únniń úılesimimen baýrap alady. Eske salar bolsaq, 2016 jyldyń aqpan aıynda «Astana Opera» Sımfonııalyq orkestri ataqty «Dala ańyzy» týyndysyn Marıın teatrynyń Kontsert zalynda joǵary deńgeıde usynǵan bolatyn.

«Astana Opera» Sımfonııalyq orkestriniń solısi, birinshi skrıpkasy Baǵdat Ábilhanovtyń keremet oryndaýynda álemniń eń tanymal skrıpkashylarynyń repertýarynan laıyqty oryn alǵan shyǵarmalar - M.Brýhtyń orkestrmen skrıpkaǵa arnalǵan №1 kontserti sol mınor, or. 26 oryndalady.  Kórnekti romantıkalyq jaýhar týyndylardyń biri osy janr tarıhyndaǵy eń tanymal skrıpkalyq kontsertterdiń qataryna enedi. Beınelerdiń aıqyndyǵy, tereńdigi, qanyqtyǵy, eliktirer kontsert áýeniniń ásemdigi, jeke partııany asqan sheberlikpen jetkizýi, solıst pen orkestrdiń áserli suhbaty 150 jyl boıy tyńdarmandardy tamsandyryp keledi.

P.Chaıkovskııdiń №4 sımfonııa, fa mınor, op. 36  týyndysy shyrqalady - bul shyǵarmasynda kompozıtor óziniń kúıinishi, ómir týraly, adam taǵdyry, jeke tulǵa men qorshaǵan orta qarym-qatynasyna qatysty oılarǵa erekshe mán bergen. Tórtinshi sımfonııada adamnyń aınymas taǵdyr kúshterimen qaqtyǵysy kórsetilgen. Týyndy sımfonııalyq mýzykanyń túrli salalaryndaǵy sazgerdiń burynǵy izdenisteriniń qorytyndysyn shyǵaryp, janrdyń jańa mindetterin, tyń túsinikterin alǵa qoıady. P.Chaıkovskııdiń aýqymdy sımfonııalyq kompozıtsııalary kúıinishtiń romantıkalyq qarqyndylyǵymen, mýzyka tiliniń beıneliligimen, ótkir de áserli kereǵarlyǵymen, formasynyń tolyqtyǵymen erekshelenedi.

Osy keshte «Astana Opera» Úlken zalynyń sahnasyna alǵash ret maestro Aleksandr Tıtov shyǵady. Dırıjer Sankt-Peterbor konservatorııasynyń professory, Marıın teatry, VVS Shotlandııa orkestri, La Skala teatry, Reseıd Úlken teatrynyń shaqyrylǵan dırıjeri bolyp tabylady. 2007 jyly Peterbor memlekettik akademııalyq sımfonııalyq orkestrine jetekshilik etken. Onyń marapattarynyń ishinen Tokıoda ótken halyqaralyq dırıjerler baıqaýyndaǵy jeńisin, Sankt-Peterbordyń «Altyn sofıt» joǵarǵy teatraldyq syılyǵyn, Sankt-Peterbor gýbernatorynyń syılyǵyn atap ótýge bolady. Maestro Aleksandr Tıtov álemniń eń úzdik teatrlaryndaǵy spektaklderge dırıjerlik etip, qoıylymyn júzege asyrǵan, onyń 100-den asa kúıtabaqtary bar.

Skrıpkanyń jeke partııasyn tanymal qazaqstandyq aspapshy sheber, «Astana Opera» Sımfonııalyq orkestriniń birinshi skrıpkasy Baǵdat Ábilhanov oryndaıdy. Ártis orkestrdiń qatysýymen oryndalatyn belsendi kontserttik qyzmetin júrgizedi jáne solıst retinde óz Otany men AQSh, Kanada, Frantsııa, Nıderlandy, Italııa, Vengrııa, Belgııa, Reseı jáne taǵy basqa shetelderde jıi gastroldik saparmen óner kórsetedi. Mýzykanttyń marapattary qatarynda D.Shostakovıch atyndaǵy halyqaralyq baıqaýy (Máskeý), V.Bellını atyndaǵy halyqaralyq baıqaýy (Sıtsılııa) jáne t.b. saıystardyń laýreaty ataǵy bar.  «Ereń eńbegi úshin» medalimen marapattalǵan, «Daryn» memlekettik jastar syılyǵynyń ıegeri.

Bastalýy saǵat 19:00-de.