«Astana Opera» sahnasynda «La Skala»
ASTANA. QazAqparat - «Astana Opera» teatry aty ańyzǵa aınalǵan «La Skala» teatrymen birge 9, 11, 12 mamyrda «Toska» operasynyń tusaýkeserin usynady.
«Toska» operasy - bul álemge áıgili «La Skala» teatrynyń túpnusqadaǵy qoıylymynyń jas teatr sahnasyna kóshirilýi. Joǵary sapaly materıaldardan ázirlengen dekoratsııalar men kostıýmder mılandyq teatrdyń sheberhanalarynda jasalǵan. Endi elorda turǵyndary men qonaqtary operanyń otany - Italııanyń uly ónerin óz kózimen kóretin keremet múmkindikke qol jetkizedi, dep habarlaıdy «Astana Opera» teatrynyń baspasóz qyzmeti.
Kórermenniń eleginen operada aty shyqqan ıtalıandyqtar: álemdik opera sahnalarynda joǵary suranysqa ıe, óleńdi mánerine keltirip oryndaýdyń sheberi, Pavarottı, Domıngo jáne Karrerastan keıingi «tórtinshi» tenor degen attan úmitker - Marselo Alvares (Kavaradossı), sońǵy jyldary bıik sahnalardy moıyndata bastaǵan ıtalıandyq soprano Anna Pırotstsı (Toska), ataqty barıton Paolo Sılverıdiń shákirti - Alberto Mastromarıno (Skarpııa) ótedi. Dırıjeri - álemdegi belgili maestro Danıel Oren, rejısseri - Lýka Ronkonı, onyń shoqtyǵy bıik qoıylymdary únemi teatr áleminde aıtýly oqıǵaǵa aınalady. Bir ǵasyrdan astam ýaqyt buryn dúnıege kelgen bul týyndy álemdik repertýarlarda jıi oryndalatyn úzdik operalardyń biri. Atalǵan mýzykalyq shyǵarmanyń áýeni kóptegen kınofılmderde qoldanǵandyqtan, keńinen taralyp, kópshilikke tanymal boldy, sebebi onyń jelisi operadaǵydaı dramatızmge, satqyndyqqa, ólim jazasynyń kórinisterine toly. Dj. Pýchchınıdiń eń dramalyq operasynyń áserli kórinisteri kórermen nazaryn basynan aıaǵyna deıin jipsiz baılaıdy.
Margerıta Pallıdiń kúshti sezim jatqan oıyn jetkizetin dekoratsııasy ótken júzjyldyqtyń tarıhı oqıǵasy - Napoleon basqarǵan frantsýz áskeriniń 1800 jyly Italııaǵa basyp kirgen kezin sýretteıdi. Vera Marzottyń nobaıymen ázirlengen kostıýmderdiń naqyshy da oqıǵany anyq beıneleıdi.
Qoıýshy rejısser basty nazardy adamnyń qushtarlyǵyna, naqtyraq aıtqanda, saıası oqıǵalarǵa iligip, ozbyrlyqtyń, azaptyń, ólim jazasynyń qurbanyna aınalyp, taǵdyr tálkegine túsken ǵashyqtar - sýretshi Kavaradossı men ánshi Toska jaıly oqıǵaǵa aýdarady.
Opera jelisi tarıhı negizi bar búginginiń trıllerin eske túsiredi. Italıandyq ánshi ári patrıot Toska óz ómirine ózi balta shabady, osy tusta rejısser keıipkeriniń ólimi arqyly da onyń rýhynyń ásemdigin, asqaq ekenin kórsete aldy.
«Astana Opera» teatry dırektorynyń shyǵarmashylyq suraqtar jónindegi keńesshisi Ýılıam Gratsıozıdiń aıtýynsha, uly ıtalıandyq sheberler kórermenge alyp sezim kúshine jáne beıneli áserge toly qoıylym usynady.
