«Astana Opera» sahnasynda grek kompozıtorlarynyń shyǵarmalary oryndalady
ASTANA. QazAqparat - 18 naýryz kúni «Astana Opera» teatrynyń sahnasynda Abaı atyndaǵy Memlekettik opera jáne balet teatry, Qazaq Ulttyq óner ýnıversıteti men Reseıdiń Úlken teatrynan kelgen qonaqtar «Qazaq dalasynda Egeı teńiziniń samaly» kontsertinde óner kórsetedi, dep habarlaıdy QazAqparat.
Teatrdyń baspasóz qyzmetiniń habarlaýynsha, «Astana Opera» sımfonııalyq orkestrine Qazaqstannyń eńbek sińirgen qaıratkeri Asqar Bóribaev dırıjerlik etedi. Sonymen qatar kórermen qaýymdy Reseı Úlken teatrynyń solısi Marına Mınına jáne daryndy jas skrıpkashy Jandos Muhamedımen keremet kezdesý kútýde.
Fortepıano partııasyn «Astana Opera» teatry opera trýppasynyń bas kontsertmeısteri, «Mádenıet qaıratkeri» Elena Sahno oryndaıdy.
Baǵdarlamaǵa álemdik kameralyq-vokaldyq mýzyka jaýharlary engen. Alǵash ret «Astana Opera» sahnasynda grek kompozıtorlary Mıkıs Teodorakıs, Manos Hadzıdakıs pen Stavros Ksarhakostyń vokaldyq týyndylary shyrqalady.
Halyqaralyq baıqaýlardyń laýreaty Marına Mınına 20 jyldan astam ýaqyt boıy Reseı Úlken teatrynyń opera trýppasynda eńbek etýde. Úlken teatrdyń barlyq qoıylymdary men álem boıynsha ótken gastrolderine tabysty qatysqan. 2014 jyldan bastap «Globus Music International» kóne mýzyka ansambliniń solısi bolyp tabylady.
Halyqaralyq baıqaýlardyń laýreaty Jandos Muhamedı men «Astana Opera» Sımfonııalyq orkestriniń oryndaýynda qazaq mýzykasynyń klassıgi Ahmet Jubanov pen ıspan kompozıtory Pablo Sarasateniń shyǵarmalary kórermenge jol tartady.
«Ispan skrıpkashysy ári kompozıtory P.Sarasate asqaq sheber skrıpkalyq ónerge arnap tamasha týyndy jasady. Skrıpkamen orkestrge arnalǵan Introdýktsııa men Tarantellany klassıkalyq mýzykanyń jaýhary dep ataýǵa bolady. Sarasate skrıpkamen án salǵanda - tyńdaýshylary shattyqqa bólengen; ol ıspan halyq bıleriniń kórkem sýretterin «beınelegen» - al tyńdarmannyń qııalynda olar jan bitkendeı áserde bolǵan. Qala turǵyndary men qonaqtaryna osynaý shýaqty kóktemniń keshinde keremet mýzykadan tolyqqandy lázzat alyp, rahattanýyna tilektespin», - dep bólisti skrıpkashy Jandos Muhamedı.
Eske salar bolsaq, maestro Asqar Bóribaev uzaq jyldar boıy Grekııada jumys jasaǵan. Álemniń kóptegen elderinde kontsert bergen. «Konchertone» kameralyq orkestriniń negizin qalady. Asqar Ysmaıylulynyń ustazdyq qyzmeti de tabysty júzege asty - onyń shákirtteri kórnekti mýzykanttar, mádenıet qaıratkerleri atandy. Qazirgi tańda dırıjer retinde belsendi kontserttik qyzmetin atqarýda. Sımfonııalyq orkestrdiń oryndaýynda qazaqstandyq, grek jáne batys eýropalyq kompozıtorlardyń týyndylary shyrqalady.
