«Astana Opera» sahnasynda Borıs Eıfman qoıatyn «Roden» baletiniń tusaýy kesildi

Basty rólde Ogıýst Rodendi daryndy Jánibek Imanqulov somdaıdy, Kamılla Klodeldi jas ári jigerli Áıgerim Beketaeva, ekinshi quramda Rodenniń rólinde Rústem Seıitbekov, Kamıllany Gaýhar Ýsına oınaıy. Ártisterdi daıyndaýmen peterborlyq ustazdar Olga Tolmakova men Oleg Paradnık aınalysty.

«Roden» baleti - uly músinshi Ogıýst Roden men onyń jas oqýshysy Kamılla Klodeldiń qaıǵyly ómiri jaıly baıandaıtyn joǵary deńgeıli kórkem shyǵarma. Qos ǵashyqtyń sezimge toly romanynda qyzǵanysh pen túıini sheshilmes túsinispeýshilik aralasyp, shyǵarmashylyq odaqqa túıisedi. Eıfman áıelder mineziniń transformatsııasy: Rozanyń (Rodenniń nekedegi áıeli) kúıeýine qol jetkizem dep sátsiz aıaqtalatyn kúresin; ustazymen aıyrylysqandyqtan shyǵarmashylyq tabysynyń shyrqaý shyńynda esinen adasyp, 26 jyldan keıin kóz jumatyn oqýshy Kamılla Klodeldiń mahabbatyn epti beıneleıdi. Roden bolsa, qıyn kezeńge tap bolyp, qatty azap shegedi. Ol úshin uly músinshi atanýdyń quny qymbatqa túsedi, jan tynyshtyǵynan, densaýlyǵy men baqytynan aıyrylady.

Úsh birdeı taǵdyrdyń qaıǵyly aıaqtalatynyna qaramastan balet túńiltedi deýge bolmaıdy, sebebi músinshiler sheberhanasyndaǵy shyǵarmashylyq úrdisi kezindegi qýanyshty sátter, áserli «Kankan» bıi qoıylatyn kabareden kórinis «Roden» baletin jarqyn etip, sezimge toltyrady.

«Astana Opera» baletiniń kórkemdik jetekshisi Nurqalıev Tursynbek, klassıkalyq bı bıleıtin ártister úshin «Modern» stılindegi shyǵarmalardy oryndaý qıynǵa soqqanyn atap ótti. «Yrǵaqty, stıldi, tehnıkalyq elementterdi meńgerý qajet. «Astana Opera» baletiniń ártisteri - ámbebap, olar eki aı tynbaı jumys isteýdiń arqasynda Borıs Eıfmannan esetin emotsııany uǵyndy», - deıdi Nurqalıev.