«Astana Opera» sahnasynda Bıbigúl Tólegenovanyń gala kontserti ótedi
ASTANA. QazAqparat - Aty ańyzǵa aınalǵan ánshi, Halyq ártisi Bıbigúl Tólegenovanyń 85 jyldyǵyna arnalǵan benefısi 30 qyrkúıekte «Astana Opera» sahnasynda ótedi.
«Baǵdarlamada qazaqstandyq jáne sheteldik kompozıtorlardyń operalarynan arııalar, halyq ánderi, romanstar, aspaptyq shyǵarmalar qamtylǵan. Gala kontsertte Bıbigúl Ahmetqyzy Tólegenovanyń ózi, sondaı-aq mereıtoı ıesiniń qurmetine belgili qazaqstandyq opera ánshileri, shákirtteri, onyń dástúrin jalǵastyrýshylar, Bıbigúl Tólegenova konkýrsynyń laýreattary jáne basqalary án shyrqaıdy. Sonymen qatar «Astana Opera» hory jáne sımfonııalyq orkestri qatysady», dep habarlaıdy memlekettik opera jáne balet teatrynyń baspasóz qyzmetinen. Munymen qosa qazaqstandyq kórermenderdiń súıikti ánshisiniń qurmetine kórme ashylyp, onda B.Tólegenovanyń qoıylymdarǵa jáne kontsertterge kıgen kostıýmderi, jeke zattary, marapattary qoıylady. Kórmede ánshiniń ómirine jáne shyǵarmashylyǵyna arnalǵan fotogalereıany da tamashalaýǵa bolady.
«Bıyl mereıtoıym, sol sebepti qazirgiler benefıs deıdi, men sol esep berýge kelýim kerek boldy», - deıdi ánshiniń ózi.
Ol «Astana Opera» solısteriniń jartysy B.Tólegenova atyndaǵy konkýrstyń laýreattary ekenin, onyń ishinde Súndet Baıǵojın, Álfııa Kárimova, Medet Shotabaev, Talǵat Musabaev jáne basqalary bar ekenin atap ótti.
