Astana opera Reseıdiń Úlken teatrymen ártister almasady
ASTANA. QazAqparat - Máskeýde Reseıdiń Úlken teatry men «Astana opera» arasynda yntymaqtastyq týraly memorandýmǵa qol qoıyldy, dep habarlaıdy Elorda.info .
Qujatqa Reseıdiń Úlken teatrynyń bas dırektory Vladımır Ýrın men «Astana opera» teatrynyń dırektory Ǵalym Ahmedıarov qol qoıdy.
«Memorandým mamandar, ártister, oryndaýshy ujymdar almasýdy, ózara konsýltatsııalyq kómek kórsetýdi, gastroldik almasýlardy yntalandyrýdy, birlesken shyǵarmashylyq jobalardy uıymdastyrýdy qarastyrady», - delingen Qazaqstannyń Reseıdegi elshiliginiń resmı saıtynyń habarlamasynda.
«Astana opera» dırektorynyń syrtqy baılanystar jáne marketıng jónindegi orynbasary Aleksandr Sovostıanov buǵan deıin mádenı almasýlar aıasynda ujymdardyń ártisteri Astana men Máskeýde birli-jarym óner kórsetkenin aıtyp, endi bul úderis turaqty túrde bolatynyna senim bildirdi.
Onyń aıtýynsha, qujat eki shyǵarmashylyq ujymnyń da ártisterine úlken jol ashady.
