«Astana Opera» Parıjge úlken daıyndyqpen barǵaly jatyr
ASTANA. QazAqparat - «Astana Opera» trýppasy gastrolmen «Opera Bastılııaǵa» barady. Munda tek «Opera Bastılııa» ujymy ǵana óner kórsetýge quqyly ekenin, ózge teatrlarmen birikken qoıylymdar sırek júzege asatynyn aıta ketken mańyzdy.
«Opera Bastılııa» sahnasyn jalǵa alýǵa bolmaıdy, ǵımarat memleketke tıesili jáne Frantsııa mádenıetiniń damý jónindegi úlken keńesimen basqarylady, dep habarlaıdy atalmysh teatrdyń baspasóz qyzmeti.
Teatr dırektsııasy «Opera Bastılııa» sahnasynda parıjdik trýppadan táýelsiz sheteldik trýppa óner kórsetý múmkindigine tarıhta alǵash ret ıe bolatynyn atap ótti.
«Astana Opera» teatrynyń trýppasy 2 qarashada Frantsııaǵa kontserttik baǵdarlamamen barady. Keshtiń ajaryn teatrdyń jetekshi solısi Jupar Ǵabdýllına, sondaı-aq Denıs Matsýev, Eldar Ábdirazaqov, Fabıo Sattorı, Alan Bóribaev, Erjan Kúlibaev, Alberto Gazale, sonymen qatar «Astana Opera» sımfonııalyq orkestri men hory ashady. Birinshi bólimge asa kórnekti pıanınoshy Denıs Matsýevtiń oryndaýyndaǵy Orkestrmen fortepıanoǵa arnalǵan №2, do mınor, 18 or. kontserti kórik beredi. Sondaı-aq, E. Rahmadıevtiń jáne M. de Falıanyń tamasha týyndylary oryndalady. Dırıjerlyq tizginde - maestro Abzal Muhıtdınov.
Ekinshi bólimde kórermen Dj. Verdıdiń «Attıla» operasynyń kontserttik nusqasyn tamashalaı alady. Álemniń úzdik bas daýysty ánshisi Eldar Ábdirazaqov negizgi partııany shyrqaıdy. Odabellany Jupar Ǵabdýllına oryndasa, Forestonyń rolin Fabıo Sattorı somdaıdy. Dırıjerlyq tizginde - álemge áıgili dırıjer Alan Bóribaev.
«Astana Opera» teatrynyń dırektory Tólegen Muhamedjanov «Opera Bastılııa» sahnasynda óner kórsetý - barlyq ujym úshin úlken qurmet jáne úlken jaýapkershilik ekenin atap ótti. «Bizge ózimizdi álemniń eń úzdik sahnalarynyń deńgeıinde qarastyrylatyn teatr retinde málimdeıtin múmkindik týyp tur, nege deseńiz, Qazaqstannyń mádenı oshaǵynyń áleýeti zor: sheberligi asqan orkestr, erekshe hor, jarqyraǵan opera solısteri men balet ártisteri bar», - dep atap ótti Tólegen Muhamedjanov.
