«Astana Opera» óner áleminiń juldyzdaryn qarsy alady
ASTANA. QazAqparat - 2 naýryz kúni «Astana Opera» sahnasynda aıtýly dırıjer Ilıa Mashkevıch (Belgııa), qazaqstandyq jáne ıtalıandyq kórermenniń súıiktileri - «Astana Opera» solısi soprano Marııa Mýdrıak pen Qazaqstannyń eńbek sińirgen qaıratkeri, Italııa Juldyzy Ordeniniń ıegeri tenor Medet Chotabaev óner kórsetedi, dep habarlaıdy QazAqparat.
«Mýzykalyq óner jaýharlary» kontserti «Astana Opera» teatrynyń sımfonııalyq orkestriniń qatysýymen ótedi.
Kontsert baǵdarlamasyna tyńdarmandardyń súıikti týyndylary engen. Birinshi bólim uly cheh kompozıtory Antonın Dvorjaktyń ataqty №9 Sımfonııasymen ashylady. Bul shyǵarmany «Jańa qurlyqtan» dep te ataıdy.
Maestro Ilıa Mashkevıch bul sımfonııany jıi oryndaıtynyn atap ótti.
«Meniń oıymsha, osynaý mýzykanyń qudyreti - onyń boıynda tasyǵan kúsh-qýaty men keremet áýenderdiń moldyǵynda jatyr. A.Dvorjak cheh ultynan bolǵandyqtan, óziniń túp-tamyrynan tolyǵymen kete almady. Degenmen de, sımfonııada, ásirese, ekinshi bóliminde úndis Amerıkasynyń atmosferasy únemi sezilip turady», - deıdi ol.
Ilıa Mashkevıch dırıjer retinde shaqyrýmen Reseı, Japonııa, Frantsııa, Germanııa jáne ózge elderde belsendi gastroldik qyzmetin atqarady. Sheberlik sabaqtaryn berip, teatr men kınoǵa arnap mýzyka jazady. Elordalyq teatr sahnasynda dırıjer alǵash ret óner kórsetpek. Alaıda, ol qaı jerde jumys jasasa da, óziniń basty qaǵıdasy árbir mýzykantty qurmetteý dep biledi.
«Oınaıtyn olar, men tek baǵyttaımyn. Daıyndyqtyń alǵashqy mınýttarynda orkestr men árbir jekelegen mýzykanttyń kásibı deńgeıin baǵalaýǵa tyrysamyn. Budan keıin, mýzykany qabyldaýdaǵy ózimniń taldaýymdy usynamyn. Túrli orkestr bolady, biraq ustanymdary bir», - dep atap ótti maestro.
Kontserttiń ekinshi bólimi vokaldyq mýzykaǵa arnalady: soprano Marııa Mýdrıak pen tenor Medet Chotabaev tyńdarman nazaryna opera óneriniń jaýharlaryn usynady.
«6 sáýirde 25 jasqa tolýymnyń qarsańynda «Astana Operada» júregime jaqyn qazaqstandyq kórermenim - ózim hat-habar alysyp ári kontsertterimde kezdesip júrgen otandastarym men jankúıerlerimniń aldynda ónerimdi ortaǵa salamyn. Barshańyzdy elordalyq teatrda ótetin «Mýzykalyq óner jaýharlary» kontserti men 19 sáýirge josparlanyp otyrǵan Dj.Pýchchınıdiń «Bogema» operasynyń premerasyna shaqyramyn. Qatarynan osy kezeńde Reseıdiń Úlken teatrynda «Bogema» men Beırýttegi «Travıata» operasyna qatysamyn, alaıda álemniń úzdik teatrlarynyń biri - «Astana Operada» týǵan halqymmen qaýyshýǵa asyqpyn! Bul kontsertke arnap tańdaǵan repertýarym meniń ótkenimdi, osy shaǵym men keleshegimdi qamtıdy. Kontserttiń shymyldyǵy mansap jolyma bastaý bolǵan G.Donıtsettıdiń «Don Paskýale» operasyndaǵy Norınanyń arııasymen túrilmek. Qazirgi shaǵym dep osy jyly Avstralııadaǵy Melbýrn opera teatrynda ótetin debıýtimdi aıtyp otyrmyn. Onda D.Makvıkardyń áıgili qoıylymyndaǵy «Faýst» operasynda Margarıtanyń bas partııasyn oryndaımyn, áriptesim - tanymal tenor Saımır Pırgý. Al bolashaǵym degenim - qazirden bastap daıyndap júrgen «Trýbadýr» operasyndaǵy Leonoranyń arııasy. Budan bólek, baǵdarlamada Dj.Verdı men Dj.Pýchchınıdiń operalarynan keremet dýetter usynbaqpyz», - dedi Marııa Mýdrıak.
Al «Astana Opera» teatrynyń jetekshi solısi Medet Chotabaev Marııa Mýdrıakpen birge dýette án shyrqaýǵa qýanyshty ekenin ári tyńdarmandarǵa arnap birneshe tosynsyı ázirlegendigin aıtty.
«Bul kontsertte sahnamyzda buryn-sońdy meniń oryndaýymda shyrqalmaǵan jańa arııalarmen óner kórsetpekpin. Orkestrmen birge Ý.Djordanonyń «Fedor» operasynan Lorıstiń arııasyn usynatyn bolamyn, bul óte áserli nómir, sondaı-aq A.Laranyń «Granada» áni shyrqalady. Munymen qosa, kórermen qaýym ataqty arııalardy, máselen, Dj.Pýchchınıdiń «Toska» operasynan Kavaradossıdiń arııasyn qýana qabyldaıdy dep esepteımin», - dedi ol.
