«Astana Opera» Omanda «Koppelııa» baletin usynady
ASTANA. KAZINFORM – «Astana Opera» teatry 4-5 jeltoqsanda Maskat Koroldik opera teatry sahnasynda óner kórsetedi.
Mádenıet jáne aqparat mınıstrligi baspasóz qyzmetiniń málimetinshe, Omannyń basty mýzykalyq ortalyǵynda ujym Leo Delıbtiń tereń ári jarqyn baletteriniń biri «Koppelııany» usynady. Qoıylymǵa maestro Rýslan Baımýrzın dırıjerlik etedi.
Kemeńger frantsýz horeografy Rolan Petı bul qoıylymy – ıronııaǵa toly týyndy. Ol Gofmannyń tylsym oqıǵasyn sheber paıymdap, ony jarqyn komedııaǵa aınaldyrdy.
Balet «Astana Opera» repertýaryna 2019 jyly endi jáne sol sátten bastap trýppanyń súıikti qoıylymdarynyń birine aınaldy. Bıyl kóktemde spektakldi Sankt-Peterborda ystyq yqylaspen qabyldady. Onda synshylar kordebalettiń kásibıligi men solısterdiń sheberligin atap ótti.
Maskatqa balet ártisi men tehnıkalyq toptan turatyn 55 adam barady. Sonymen qatar dekoratsııalar men kostıýmder de jolda. Oman úshin bul – qazaqstandyq artısterdiń oryndaýyndaǵy Rolan Petıdiń biregeı horeografııasymen tanysýdyń taptyrmas múmkindigi. 4 jeltoqsanda sahnaǵa Qazaqstannyń eńbek sińirgen qaıratkerleri Baqtııar Adamjan, Aıgerim Beketaeva men Rústem Seıitbekov shyǵady. 5 jeltoqsanda basty partııalardy Qazaqstannyń eńbek sińirgen qaıratkeri Erkin Rahmatýllaev, Oljas Tarlanov jáne Shuǵyla Ádephan oryndaıdy.
«Astana Opera» teatrynyń dırektory Aleksandr Sovostıanovtyń aıtýynsha, mundaı gastrolderde óner kórsetý – úlken jaýapkershilik. Onyń sózinshe, artısterge otandyq balet óneriniń deńgeıin kórsetý mindeti júktelip otyr, al tańdalǵan qoıylym olardyń bı sheberligi men akterlik qabiletterin tolyq kórsetýge múmkindik beredi.
Gastrolder Qazaqstan Respýblıkasynyń Mádenıet jáne aqparat mınıstrliginiń qoldaýymen ótedi.