«Astana Opera» mýzyka men poezııa úılesimin pash etedi
ASTANA. QazAqparat - «Astana Opera» teatrynyń jetekshi solısteri men sheber aspapshylary tyńdarman nazaryna keremet baǵdarlama usynady. 12 jeltoqsan kúni elordalyq teatrdyń Kameralyq zalynda «Dybys poezııasy men sóz sazy» kontserti ótedi, dep habarlaıdy QazAqparat teatrdyń baspasóz qyzmetine silteme jasap.
«Romantıkalyq keshtiń taqyryby - poezııa men mýzykanyń ózara qarym-qatynasy, mýzykalyq týyndylarda poetıkalyq sózderdiń kórinis tabýy. Poezııa mýzykanyń tereńdigi men mánerliligin sezinýge kómek berse, al mýzyka, óz kezeginde, óleńmen jazylǵan beınelerdiń barynsha qanyq ári aıqyn ashylýyna septigin tıgizedi. Poezııa men mýzykanyń ózara baılanysyn túsiný avtordyń túpki oıyna tereń boılap, ózińe ónerdiń uly jaýharlary arqyly tyń dúnıelerdi ashýǵa múmkindik beredi», - dep atap ótti kontsert avtory Elena Sahno.
Kameralyq zal sahnasyna operanyń jaryq juldyzdary - Qazaqstannyń eńbek sińirgen ártisi, QR Memlekettik syılyǵynyń laýreaty Maıra Muhamedqyzy, Qazaqstannyń eńbek sińirgen qaıratkeri Dına Hamzına, Bashqurtstannyń eńbek sińirgen ártisi Alfııa Karımova, halyqaralyq baıqaýlardyń laýreattary Evgenıı Chaınıkov, Ramzat Balakıshıev, sondaı-aq «Astana Opera» teatrlyq balalar stýdııasynyń hory, hormeısteri - Altynǵanym Ahmetova shyǵady. Daryndy aspapshy-mýzykanttar - Kırıll Krasıýkov (skrıpka), Kýrvanjan Ahatov (vıolonchel), Lıýbov Tkachenko (arfa) óz ónerlerin pash etpek. Fortepıano partııasynda - Mádenıet qaıratkeri Elena Sahno.
«Astana Opera» teatry ártisteriniń oryndaýynda ataqty klassık-kompozıtorlardyń uly poezııany biregeı usyna bilgen ári kópshilik súıip tyńdaıtyn týyndylary shyrqalady. Olardyń qatarynda Geteniń sózine jazylǵan Abaıdyń «Qarańǵy túnde taý qalǵyp», N.Kýkolnıktiń sózine M.Glınkanyń «Somnenıe», A.Tolstoıdyń sózine P.Chaıkovskııdiń «To bylo ranneıý vesnoı», P.Kozlovtyń sózine A.Oppeldiń «Zabylı vy» jáne t.b. ánderi bar.
A.Pýshkınniń sózine jazylǵan vokaldyq týyndylar oryndalatyn bolady, atap aıtqanda, Abaıdyń Tatıananyń áni «Amal joq, qaıttym bildirmeı», M.Glınkanyń «ıA pomnıý chýdnoe mgnovene», «V krovı gorıt ogon jelanıa», N.Rımskıı-Korsakovtyń «Redeet oblakov letýchaıa grıada», «Na holmah Grýzıı», S.Rahmanınovtyń «Ne poı, krasavıtsa, prı mne», A.Dargomyjskııdiń «ıÝnosha ı deva», Ts.Kıýıdiń «Tsarskoselskaıa statýıa» jáne t.b.
Tyńdarmandarǵa P.Chaıkovskııdiń «Pıkovaıa dama» operasynan grafınıanyń jatyn bólmesindegi sahnalyq kórinisi, N.Rımskıı-Korsakovtyń «Altyn qoraz» operasynan Shemahan patshaıymynyń arııasy, «Patsha qalyńdyǵy» operasynan Lıýbasha men Elıseı Bomelııdiń sahnalyq kórinisi syndy klassıkalyq opera jaýharlarynan úzindiler usynylady. Budan bólek, B.Asafevtiń «Baqshasaraı burqaǵy» baletinen aspaptyq mýzyka, K.Davydovtyń «Ý fontana» vıolonchel men fortepıanoǵa arnalǵan pesasy t.b. shyrqalady.
Bastalýy saǵat 19:00-de.
