«Astana Opera» men Reseıdiń Úlken teatry yntymaqtastyq týraly memorandýmǵa qol qoıdy
ASTANA. QazAqparat - Reseıdiń basty ulttyq teatry - ataqty Úlken teatr Qazaqstandaǵy úzdik «Astana Opera» teatrymen tyǵyz yntymaqtastyqta bolady. Bul týraly teatrdyń baspasóz qyzmeti habarlady.astan
15 mamyrda Máskeýde ótken ekijaqty kelissózder nátıjesinde Yntymaqtastyq týraly memorandýmǵa qol qoıyldy. Kelisim Reseıdegi Qazaqstan Elshiliginiń qoldaý kórsetýimen júzege asty.
«Astana Opera» teatrynyń dırektory Ǵalym Ahmedıarov jáne Reseıdiń Úlken teatrynyń bas dırektory Vladımır Ýrın qol qoıǵan memorandýmǵa sáıkes, taraptar birneshe baǵyt boıynsha seriktestikti damytady. Kelissóz barysynda birqatar jobalar talqylandy. Mamandarmen, ártistermen, oryndaýshylyq ujymdarmen ózara tıimdi tájirıbe almasýmen qatar aldaǵy josparǵa gastrolderdi, birlesken qoıylymdardy uıymdastyrý, eki teatrdyń jetekshi solıstteriniń sheberlik sabaqtaryn ótkizý jáne mýzykalyq baıqaýlar men festıvaldarǵa qatysý kiredi.
- Qazaqstan Respýblıkasynyń Prezıdenti N.Á. Nazarbaevtyń qoǵamdyq sanany jańǵyrtý jóninde atap ótken mindetteriniń biri, zamanaýı qazaqstandyq mádenıetti álemdik keńistikke pash etý bolyp tabylady. Bul Elbasy aıqyndap bergendeı, ulttyq mádenıettiń úzdik týyndylaryn tańdap qana qoımaı, olardy shetelde tanytatyn óte mańyzdy jáne kóp eńbekti qajet etetin jumys. Memorandýmǵa qol qoıý Mádenıet jáne sport mınıstrliginiń Elbasymyzdyń strategııasyn iske asyrýǵa baǵyttalǵan josparlardyń bir bóligi, - dep atap ótti Ǵalym Ahmedıarov.
Aıta ketsek, qazaqstandyq ártister buǵan deıin áıgili máskeýlik sahnada neshe márte óner kórsetken. Mysalǵa, «Astana Opera» teatrynyń jetekshi solısi Qazaqstannyń eńbek sińirgen qaıratkeri Talǵat Musabaev P. Chaıkovskııdiń «Evgenıı Onegın» operasyndaǵy basty partııany oryndaǵan. Óz kezeginde Úlken teatr solısteri de ónerin astanalyqtarǵa syılaý múmkindigine ıe boldy. Prıma-balerına, Reseıdiń halyq ártisi Svetlana Zaharova «Astana Opera» teatrynyń álemdik tusaýkeserine arnalǵan Gala-kontsertke qatysqan.
«Astana Opera» seriktesteriniń qatarynda - La Skala, San-Karlo, Karlo Felıche (Italııa), Marıınskıı teatry, Novosibirdiń memlekettik akademııalyq opera jáne balet teatry (Reseı), Shanhaıdyń Úlken Teatry (Qytaı), «Eýropa operasy» halyqaralyq operalyq qaýymdastyǵy (Ulybrıtanııa) jáne taǵy basqa álemniń jetekshi ujymdary.
Anyqtama: Reseıdiń Memlekettik akademııalyq Úlken teatry - atalǵan eldiń teatr óneriniń damýyna ypal etken reseılik jáne álemdik mýzykalyq mádenıet dástúrlerin tanytýshy. Onyń negizi 1776 jylǵy 28 naýryzda II Ekaterına patshaıym gýbernııa prokýrory knıaz Petr Ýrýsovqa spektakl, maskarad, bal jáne ózge de oıyn-saýyq is-sharalardy qamtamasyz etý úshin on jyl merzimge berilgen «aıryqsha quqyqqa» qol qoıǵan kezde qalanǵan. Búgingi tańda XIX-XX ǵasyrlardaǵy orys mýzykalyq teatr jaýharlary teatr repertýaryndaǵy basty oryndy alyp otyr. Orys klassıkasyna qosymsha retinde Úlken teatr óz kórermeniniń nazaryna HH ǵasyrdyń avtorlaryn qosa alǵanda, batys eýropalyq kompozıtorlardyń jaýharlaryn, sondaı-aq, arnaıy tapsyrys berilgen shyǵarmalardy usynady.
