«Astana Opera» majar kompozıtory Bartok shyǵarmalarynan kontsert ótkizedi
ASTANA. QazAqparat - Belgili vengrlyq pıanınoshy Balaj Retı jáne Qazaqstannyń eńbek sińirgen qaıratkeri Abzal Muhıtdınovtiń jetekshiligindegi «Astana Opera» kameralyq orkestri, «Bela Bartoktyń mıkrokosmosy» atty kontsert usynady.
Vengrlyq uly kompozıtordyń 135 jyldyǵyna arnalǵan mýzykalyq kesh 17 qazan kúni teatrdyń Kameralyq zalynda ótedi, dep habarlaıdy teatrdyń baspasóz qyzmeti.
Áıgili sheber pıanınoshy, álem halyqtarynyń án shyǵarmashylyǵyn zertteýshi ǵalym-folklorshy B. Bartok HH ǵasyrdyń tereń oıly ári yqpaldy jańashyl tulǵalarynyń biri. Kompozıtordyń vengrlik mýzyka mádenıetine yqpaly zor boldy, onyń mýzykasy álem boıynsha úlken suranysqa ıe.
Atalǵan keshte tyńdarmanǵa B. Bartoktyń ishekti aspaptarǵa arnalǵan týyndylary, sondaı-aq fortepıanolyq shyǵarmalary: Rýmynnyń halyq bıleri, «Mıkrokosmos» kezeńinen pesalar jáne taǵy basqasy usynylady.
Balaj Retı - gýmanıtarlyq ǵylymdar doktory, B. Bartok mýzykalyq ınstıtýtyndaǵy fortepıano bóliminiń meńgerýshisi. Ol F. Lıst atyndaǵy mýzyka akademııasynyń túlegi (professor D. Nadordyń synyby). Oryndaýshy Dýblın (Irlandııa), Shevenıngen (Gollandııa), Bordo (Frantsııa), Perchah (Avstrııa) jáne taǵy basqa qalalarda ótken halyqaralyq baıqaýlardyń jeńimpazy. Annı Fısher shákirtaqysynyń ıegeri (1999-2001). Onyń kontsertteri Dýblınniń ulttyq kontsert zalynda (Irlandııa), Berlındik kontserthaýsta (Almanııa), Gvadalaharadaǵy Degollado teatrynda (Meksıka), Djakartadaǵy «Balaı Sarbını» zalynda (Indonezııa) sátti ótken.
Kontserttiń júrgizýshisi - mýzykatanýshy Sáýle Máýletova.
