«Astana Opera» Qyz Jibektiń róline kastıng jarııalaıdy
ASTANA. 25 jeltoqsan. QazAqparat - Álemge áıgili rejısser Franko Dragone «Astana Opera» teatrynyń sahnasynda qazaqtyń tuńǵysh ulttyq «Qyz Jibek» operasyn jańa qoıylymda usynady. Qoıylym 2014 jyldyń sáýir aıyna josparlanǵan. Teatr basty ról - Qyz Jibek partııasyn oryndaýshyǵa ashyq kastıng jarııalaıdy.
Kandıdatqa qoıylatyn basty talaptar - ádemi daýys (soprano), ásem kelbet, 18 ben 32 jas aralyǵyndaǵy qazaq tilin biletin, sahna plastıkasy men akterlik sheberlikti meńgergen, mýzykalyq bilimi bolýy tıis.
Ótinim 2014 jyldyń 20 qańtaryna deıin qabyldanady. Tyńdalymǵa aldyn-ala irikteý foto arqyly júrgiziledi. Ánshi «Qyz Jibek» operasynan birneshe arııa oryndaýy kerek. Tolyq aqparatty teatrdyń www.astanaopera.kz saıtynan alýǵa bolady.
Jalpy, «Qyz Jibek» operasynyń basty partııasyn oryndaǵandardy irikteý barysynda asa tanymal emes akterlar tańdalǵan kezder bolǵan, solardyń biri búginde belgili jáne halyq moıyndaǵan QR halyq ártisi Nurjamal Úsenbaeva edi. Ánshini bul rólge konservatorııanyń sońǵy kýrsynda oqyp júrgen kezinde tańdap alǵan.
Joba jaıly aqparat: Franko Dragone óziniń qoıylymdarǵa degen biregeı kózqarasymen tanymal, álemdik arenada eksklıýzıvti mýzykalyq jobalardyń rejısseri retinde suranysqa ıe. Aǵymdaǵy jyldyń jeltoqsan aıynda «San-Karlo» teatrynda Dragone qoıǵan «Aıda» operasynyń tusaýy kesilip, álemdegi jetekshi teatrlardyń úlken qyzyǵýshylyǵyn týdyrǵan edi. Tusaýkeserden keıin rejısserǵa birqatar usynystar tústi, sonyń ishinde «Astana Opera» teatrynyń basshylyǵy jasaǵan usynys ta bar.
