«Astana Opera» qyz-kelinshekter merekesine oraı mýzykalyq shoý usynady
ASTANA. QazAqparat - Halyqaralyq áıelder kúnin «Astana Opera» jarqyn kontserttik baǵdarlamalarmen atap ótpek. Teatrdyń Kameralyq zalynda 7 naýryzda «Myń bir syrly sezim» merekelik kontserti ótedi, al 9 naýryzda halyq ataqty otandyq mýzykant-aspapshylardyń «Bıge shaqyrý» kontsertin tamashalaı alady, dep habarlaıdy QazAqparat.
Teatrdyń baspasóz qyzmetiniń habarlaýynsha, kóktemgi shýaqty mereke qarsańynda názik jandylarǵa teatrdyń opera solısteri, hor men orkestr ártisteriniń oryndaýynda tamasha mýzykalyq shoý usynylmaq. Qazaqstannyń eńbek sińirgen qaıratkeri Jámılıa Jarqymbaeva, halyqaralyq konkýrstardyń laýreattary Tatıana Vıtsınskaıa, Bolat Esimhanov, Malıka Mınızını, Nazym Saǵyntaı, Elena Ganja, Qazaqstannyń eńbek sińirgen ártisi Ǵalııa Baıǵazınova, Erjan Saıpov, Qazybek Dosmuhambetov, Erulan Kámel, Aqylbek Tabynbaev, Almat Іzbambetov, Aıda Qurmanaeva, Batyrjan Smaqov Kameralyq zal sahnasyna shyǵady. Fortepıano partııasyn halyqaralyq konkýrstardyń laýreaty Raýshan Beskempirova oryndaıdy.
«Teatrdyń shyǵarmashylyq ujymy atynan súıikti, názik, súıkimdi arýlardy osy bir tamasha merekemen quttyqtaımyn. Eń aldymen sizderge zor densaýlyq, baqyt, qýanysh pen shattyq tileımin. Mahabbat áleminde shynaıy sezimge bólenińizder! Al biz sizderge kóktemgi sazymyzdy arnaımyz», - dedi Bolat Esimhanov.
N. Tilendıev, Sh. Qaldaıaqov, S. Muhamedjanov, E. Hasanǵalıev t.b. kórnekti qazaqstandyq kompozıtorlardyń týyndylary, operalyq shyǵarmalardan arııalar men dýetter saltanatty keshtiń sánin keltiredi. Buǵan qosa, álemdik mýzykalyq klassıka jaýharlarynan úzindiler, onyń ishinde, Dj. Rossını, I. Shtraýs, L. Delıb, F. Legar, E. Korngold, P. Chaıkovskıı, N. Rımskıı-Korsakov, I. Brodskııdiń shyǵarmalary, sondaı-aq tyńdarmandardyń súıikti qazaq, orys, neapolıtandyq ánderi men romanstary shyrqalady.
Kórermenderdiń suraýy boıynsha «Astana Opera» teatrynyń ákimshiligi saǵat 15:00-ge osy kontserttiń qosymsha kórsetilimin qosqandyǵyn atap ótken jón.
9 naýryzda tanymal ártister, halyqaralyq konkýrstardyń laýreattary Ermek Qurmanaev (vıolonchel), Evgenııa Qurmanaeva (skrıpka), Anar Kamelınovanyń (fortepıano) qatysýymen «Bıge shaqyrý» atty aspaptyq mýzyka kontserti ótedi.
Bul keshte D. Popperdiń «Tarantella», «Kontserttik polonez», «Elfter bıi», K. Sen-Sanstyń «Janýarlar karnavaly» sıýıtasynan «Aqqý», G. Venıavskııdiń «Polonez», B. Bartoktyń «Rýmyn bıleri», M. de Falıanyń «Ispan bıleri», R. Şedrınniń «Albenıske elikteý», A. Pıatstsollanyń Le Grand Tango, sondaı-aq Býenos-Aırestegi jyl mezgilderi» tanymal toptamasynan «Kúz» jáne «Qys» shyǵarmalary oryndalatyn bolady.
Foto: astanaopera.kz
