«Astana Opera» kórermenine tańǵajaıyp mýzyka keshin usynǵaly otyr
ASTANA. QazAqparat - Dúnıejúzinde súıikti merekege aınalǵan Rojdestvo «Astana Operada» janǵa jaıly mýzyka keshinen bastaý alady. 21 jeltoqsanda «Bel Santo mýzykalyq salony» abonementiniń aıasynda teatrdyń Kameralyq zalynda «Ave Marııa» atty kontsert ótedi, dep habarlady teatrdyń baspasóz qyzmetinen.
Kórermen nazaryna ártúrli stıldegi jáne baǵyttaǵy shyǵarmalar - Jańarý dáýirinen bastap, XX ǵasyr kompozıtorlarynyń mýzykasyna deıin usynylady. Tyńdarmandy tosynsyı men jańalyq kútedi, atap aıtqanda, qazaqstandyq mýzyka súıer qaýym úshin jańa mýzykalyq shyǵarmalar oryndalyp, tanymal kompozıtsııalardyń qupııa bolyp kelgen syrlary ashylady. Elorda kórermeniniń «Astana Operadaǵy» súıikti solısteriniń oryndaýynda vokaldyq, aspaptyq janrlardaǵy batys eýropalyq kompozıtorlar: K.V. Glıýk, I.S. Bah, G.F. Gendel, V.A. Motsart, Dj. Kachchını, T. Albınonı, F. Shýbert, P. Maskanı, Sh. Gýno, A. Dvorjak, K. Sen-Sans, V. Gomes, A Pıatsolla jáne basqalardyń týyndylary shyrqalady. «Ave Marııa» - «Marııa, qýana ber» degen maǵynany bildiredi. Kontsert baǵdarlamasynda «Ave Marııa» dep birdeı atalatyn ártúrli avtorlardyń shyǵarmalary jáne basqa rýhanı mýzykanyń jaýharlary shyrqalady. «Uly kompozıtorlardyń asqaq mýzykasy erekshe rýhtandyratyn atmosfera syılap, nur shashqan Rojdestvo merekesi qarsańyndaǵy osy bir klassıkalyq mýzyka keshi tyńdarmanǵa keremet qýanysh syılaıdy», - deıdi mýzykalyq keńesshi Raýshan Beskempirova.
