«Astana Opera» kórermenderine erekshe syı daıyndap qoıdy
ASTANA. QazAqparat - «Astana Opera» shyǵarmashylyq ujymy Qazaqstan halqynyń birligi kúnin atap ótpek. Bul týraly QazAqparat teatrdyń baspasóz qyzmetine silteme jasap habarlaıdy.
1 mamyr kúni teatrdyń Úlken zalynda «Astana Operanyń» keremet jetekshi opera solısteri, Sımfonııalyq orkestri jáne hordyń qatysýymen «Týǵan jerim - altyn besigim!» atty merekelik kontserti bolady.
Vokal janrynyń has sheberleri - Qazaqstannyń eńbek sińirgen ártisi Jannat Baqtaı, Qazaqstannyń eńbek sińirgen qaıratkerleri Jupar Ǵabdýllına, Jámılıa Jarqymbaeva, Bıbigúl Januzaq, Janat Shybyqbaev, Jan Tapın, Armenııanyń Halyq ártisi Barseg Týmanıan, Bashqurtstannyń eńbek sińirgen ártisi Alfııa Karımova, halyqaralyq baıqaýlardyń laýreattary Beıimbet Tańaryqov, Tatıana Vıtsınskaıa, Bolat Esimhanov, Malıka Mınızını, Elena Ganja, Mádına Islamova, Ramzat Balakıshıev, Erjan Saıpov, Azat Málik kórermenderge óz ónerlerin pash etedi. Al halyqaralyq baıqaýlardyń laýreaty Rýslan Baımýrzın dombyrada kúmbirlete oınap, tyńdaýshylardyń qulaq quryshyn qandyrmaq.
«Astana Opera» Sımfonııalyq orkestri jáne hory. Dırıjer - Qazaqstannyń eńbek sińirgen qaıratkeri Abzal Muhıtdınov, bas hormeıster - Qazaqstannyń eńbek sińirgen qaıratkeri Erjan Dáýitov. Rejısser - Natalıa Kagadıı.
«Qazaqstan halqynyń birligi kúni - dostyq pen kelisimniń keremet kóktem merekesi. Osynaý kúnge arnalǵan «Týǵan jerim - altyn besigim!» kontsertimiz syndy mádenı sharalardyń mańyzy zor. Bul is-sharalar tek qana qazaq halqynyń salt-dástúri men ónerin kórsetip qoımaıdy, sonymen qatar ulan-baıtaq jerimizge qonys teýip, bir shańyraq astynda ómir súrip jatqan ózge de etnostardyń ádet-ǵurpyn tanystyrady. Sebebi bizdiń kóp ultty elimizde 150-den astam ult pen ulys bar. Árbir qazaqstandyq úshin osy meıram eń kóńildi ári súıikti bolyp tabylady», - dedi «Astana Operanyń» bas hormeısteri Erjan Dáýitov.
Kesh baǵdarlamasyna qazaq kompozıtorlarynyń opera, arııa, dýet jáne ánderinen kórinister engen - A.Jubanov pen L.Hamıdıdiń «Abaı» operasynan Toıbastar kórinisi, M.Tólebaevtyń «Birjan - Sara» operasynan Birjan men Saranyń dýeti, E.Rahmadıevtyń «Qamar-sulý» operasynan Qamar men Ahmettiń dýeti, «Gaýhar-tas» halyq áni, L.Hamıdıdiń «Qazaq valsi», N.Tilendıevtiń «Aq sısa», E.Hasanǵalıevtyń «Atameken», S.Erkimbekovtiń «Darhan dala» jáne t.b. ánder bar. Kórermen qaýymǵa Qazaqstanda turyp jatqan túrli halyqtardyń óneri de usynylady. N.Rımskıı-Korsakovtyń «Mamyr túni» operasynan Levko arııasy, Ý.Gadjıbekovtyń «Ker-Ogly» operasynan Nıgıar arııasy, T.Chýhadjannyń «Arshak» operasynan Arshak ІІ arıozosy, L.Delıbtyń «Lakme» operasynan Gúldi dýet, J.Bızeniń «Karmen» operasyndaǵy 4-aktiniń hory jáne t.b. tanymal shyǵarmalar shyrqalady.
Kontserttiń bastalýy saǵat 18:00-de.
