«Astana Opera» kórermenderge «Abaı armany» kontsertin usynady

ASTANA. QazAqparat - Qazaq handyǵy qurylǵanyna 550 jyl jáne qazaqtyń uly aqyny Abaı Qunanbaıulynyń týǵanyna 170 jyl tolǵanyna oraı 20 sáýirde «Astana Opera» teatrynyń Kameralyq zalynda «Abaı armany» atty kontserti ótedi, dep habarlaıdy teatrdyń baspasóz qyzmetinen.

Keshtiń shymyldyǵy Qazaq handyǵynyń qurylý tarıhy jaıly qysqametrajdy fılmmen ashylady. Onda qazaqtyń handary, handyqtyń júzge bólingeni jáne qazaq halqynyń danyshpan uly - Abaı Qunanbaıuly jaıly muraǵattaǵy biregeı materıaldar qoldanylǵan. Atalǵan keshte tyńdarman nazaryna onyń «Qaqtaǵan aq kúmisteı keń mańdaıly», «Kózimniń qarasy», «Jelsiz túnde jaryq aı», «Men sálem jazamyn», «Tatıananyń haty» (A.S.Pýshkınniń «Evgenıı Onegın» atty óleń túrindegi romany) jáne basqa da belgili týyndylary usynylady. Qazaqtyń mýzykalyq mádenıetiniń ıgiligine aınalǵan shyǵarmalar kópshilik súıip tyńdaıtyn halyq ánderimen almasady. Qazaqtyń uly aqynynyń óleńderi keshke poezııalyq arqaý bolady.

Barsha tyńdarmanǵa janǵa jaıly osy kontsertti syılaǵan solıst QR Eńbek sińirgen ártisi Ǵalııa Baıǵazınova bolsa, kontsertmeıster - Gúlzada Qusaıynova, júrgizýshiler - ónerli jastardyń «Shabyt» halyqaralyq festıvaliniń laýreaty Qaısar Ábdirov jáne Zańǵar Aqaev bolmaq.