«Astana Opera» Kameralyq zalynyń kontserttik maýsymy ashyldy
ASTANA. QazAqparat - Qazan aıynyń birinshi kúni - Halyqaralyq mýzyka kúnine oraı dástúr boıynsha «Astana Opera» Kameralyq zalynyń kontserttik maýsymy saltanatty túrde ashyldy.
Jańa maýsym mýzykalyq tosyn syıǵa toly, atap aıtqanda, kórermendi aǵymdaǵy jyldyń sońyna deıin mazmundy baǵdarlama, sondaı-aq ákimshilik ázirlegen abonementter toptamasyna arnalǵan ıkemdi jeńildikter júıesi kútip tur, dep habarlaıdy teatrdyń baspasóz qyzmeti.
«Astana Operanyń» kameralyq zaly jańa maýsymda klassıkalyq mýzykany unatatyn qaýymǵa «Bel Canto mýzykalyq salony», «Sıqyrly daýystar álemi» jáne «Teatrǵa saıahat» atty balalar abonementin usynady. Ár abonement boıynsha úsh kontsertke barýǵa bolady (aıyna bir ret).
«Abonementtiń bir taqyryp aıasyna biriktirilýi - bıylǵy maýsymnyń jańalyǵy. Bir abonementti satyp alyp, birden 3 kontserttiń bıletin ıelenýge bolady, osylaısha kórermenimizdiń ýaqytyn jáne qarjysyn únemdeı alamyz. Nátıjesinde, tyńdarmannyń úlken jeńildikke qol jetkizýge múmkindigi bar, aıtalyq, birden 3 balalar kontsertiniń abonementin satyp alsa, jeńildik 50%-ǵa teń, al úlkenderde bul kontsert baǵasynyń úshten bir bóligin quraıdy», - deıdi Kameralyq zaldyń jetekshisi Marjan Jákenova.
Kontsertke mýzykalyq daýystar alýandyǵyn pash etetin metstso-soprano, soprano, tenor, bas, barıton daýysty opera solısteri qatysady. Olardyń oryndaýynda álemdik klassıka qorjynyndaǵy qazaqstandyq jáne batys eýropalyq kompozıtorlardyń eń jaqsy operalyq týyndylarynan kórinister, tanymal ánder, romanstar, dýetter shyrqalady.
