«Astana Opera» Italııadaǵy gastrol kezinde adamzatqa úndeý joldady

Teatr baspasóz qyzmetiniń málimetinshe, bul joly da zalda ıne shanshar jer bolmaǵan. 10 qarasha kúni «Astana Opera» trýppasynyń «Karlo Felıche» sahnasyndaǵy (Genýıa, Italııa) gastroli óz máresine jetti.

Daýysqa arnalǵan partııalardy minsiz oryndaǵan: soprano - Qazaqstannyń eńbek sińirgen ártisi Jannat Baqtaı, metstso-soprano - Qazaqstannyń eńbek sińirgen qaıratkeri Dına Hamzına, tenor - Qazaqstannyń eńbek sińirgen qaıratkeri Nurlan Bekmuhambetov, barıton - Qazaqstannyń eńbek sińirgen qaıratkeri Talǵat Musabaev. «Astana Opera» orkestr mýzykanttary, hory teatrdyń bas dırıjeri, Qazaqstannyń eńbek sińirgen qaıratkeri Alan Bóribaevtyń jetekshiligimen óner kórsetti.

Atalmysh týyndy maestronyń eń súıikti shyǵarmalarynyń qataryna jatady. Ol Bethovenniń ómir súrip ári shyǵarmashylyǵyn shyńdaǵan Vena qalasynda bilim alǵan venalyq klassıkalyq mektebiniń ókili ekendigin atap ótýge bolady. Italııa jerinde avstrııalyq kompozıtordyń mýzykasyn oryndaǵan shyǵarmashylyq ujymdardyń ǵajaıyp jetistigi keremet úılesimdi jumys pen mýzykany tereń qabyldaýdyń arqasynda oryn aldy.

Alan Bóribaev shyǵarmanyń sońǵy bólimindegi «Mıllıon jandar, qaýyshyńdar!» degen uran adamzattyń soǵyssyz, daý-damaısyz, beıbitshilik pen kelisimde ómir súrýdi úırenbeıinshe, ózekti bolyp qala beretinin atap ótti.

Bul «Astana Opera» MOBT-nyń Italııadaǵy alǵashqy gastroldik sapary emestigin atap ótken jón.

- «Astana Opera» teatrynyń trýppasyn óte qatty jaqsy kóremiz, mýzykanttardyń barlyǵy - asqan sheber ıeleri. Bıyl «Abaı» operasy men Aǵartý dáýiriniń asqaq shyńy - Bethovenniń Toǵyzynshy sımfonııasyn tyńdaýǵa kele aldyq. Barlyq tórt bólimi: Allegro ma non troppo, un poco maestoso (d-moll), Molto vivace (d-moll), Adagio molto e cantabile (B-dur), Presto (d-moll - D-dur) keremet oryndalyp, adamzat rýhynyń ǵalamat ánurany retinde shyrqaldy. Meniń oıymsha, Bethovenniń dál osy Toǵyzynshy sımfonııasy adamdardyń basyn qosyp, biriktiredi. «Astana Operanyń» shyǵarmashylyq ujymy osynaý ıdeıany jetkize aldy: zalda naǵyz birlik rýhy ornady. Solısterge bravo! - dep áserimen bólisti erli-zaıypty Marko jáne Bıanka Totstsı.

- Búgingi kontsertke kelip, jan-tánimmen dem aldym. Bári kóńilimnen shyqty: hor da, orkestr de, solıster de keremet, - dedi Bernardo Pıadjı.

- L.V.Bethvenniń №9 Sımfonııasyn alǵash ret tyńdap turmyn, «Astana Opera» men «Karlo Felıche» teatrlarynyń oryndaýynda osynaý týyndymen tanysqanyma qýanyshtymyn, qos ujymnyń tamasha birlesýi oryn aldy, - dedi Donato Mýnı.

10 qarasha kúni «Astana Opera» ártisteri tek Genýıada ǵana óner kórsetip qoımaı, sondaı-aq osynaý senbilik keshte elordalyq teatrdyń balet trýppasy kesh qonaqtary - Belarýs Respýblıkasynyń Úlken teatry sahna sheberleriniń qatysýymen Astana tórinde orasan zor jetistikpen Gala-balet usyndy. Klassıkalyq horeografııa jaýharlary men qazirgi zamannyń ataqty baletmeısterleriniń aıtýly jumystary kórkin qyzdyrǵan tamasha baǵdarlamany kórermen qaýym joǵary baǵalady.

Genýıalyq kórermen «Astana Opera» teatrymen qaıta qaýyshý sátin asyǵa kútetinin jetkizdi, qazaqstandyq teatr basshylyǵy da bul bastamany qoldaıtynyn bildirdi. Qazaqstan men Italııa arasyndaǵy mádenı baılanystardyń jyl saıyn nyǵaıyp kele jatqanyn baıqaýǵa bolady.