«Astana Opera» Halyqaralyq áıelder kúnin qalaı atap ótedi
NUR-SULTAN. QazAqparat - «Astana Opera» teatry Halyqaralyq áıelder kúni merekesine oraı 6 naýryzda Adolf Adannyń «Jızel» qııal-ǵajaıyp baletin kórermen nazaryna usyndy. Bul shyǵarmany kórermender 7 jáne 8 naýryzda da tamashalaı alady, dep habarlaıdy QazAqparat óner ujymynyń baspasóz qyzmetine silteme jasap.
Zor suranysqa ıe horeografııa jaýharlarynyń biri álemdik sahnalarda 180 jyldan astam ýaqyt qoıylyp keledi, Bul joly kórermender qoıýshy baletmeıster – «Astana Opera» balet trýppasynyń kórkemdik jetekshisi Reseıdiń Halyq ártisi Altynaı Asylmuratovanyń nusqasyn tamashalaıdy.
Alda bolatyn oqıǵanyń taǵy bir mańyzdylyǵy – spektakldi keleshekte elordalyq teatrdyń osy qoıylymyna zor qyzyǵýshylyq tanytqan «Metstso» frantsýz telearnasynda translıatsııalaý úshin bul kúnderi ol taspaǵa jazylady.
– Oqıǵa jelisiniń negizinde toıǵa deıin baqılyq bolǵan qalyńdyqtar jaıly qyzyqty ejelgi ańyz jatyr. Bul baletti Halyqaralyq áıelder kúni kórsetýge ádemiligi sırek horeografııasymen, keremet mýzykasymen tańǵaldyratyny úshin ǵana emes, sondaı-aq onda mahabbat, ózin-ózi qurban etý jáne keshirim jasaý sekildi máńgilik taqyryptar beınelengendikten tańdap aldyq. Spektakl súısindirip, kóńil kúımen toltyrady, joǵary sezimderdi oıatady, – dedi Qazaqstannyń eńbek sińirgen qaıratkeri Ǵalym Ahmedıarov. – Zamana kóshi alǵa jyljyp, adamnyń ómirge degen kózqarasy, basymdyqtary ózgerip jatqanymen, ǵasyrlar boıy áıelder qaýymy otbasy oshaǵyn saqtaýshy, ıgiliktiń, tynyshtyq pen jylýlyqtyń beınesi bolyp qala beredi. Mereke qarsańynda barlyq áıelderge rızashylyǵymdy jetkizgim keledi. Kóńilderińizde árdaıym kóktem áni shyrqalsyn, ómirdiń ár kúni qýanysh, shyǵarmashylyq shabyt, baqyt, mahabbat pen sáttilik syılasyn. Sizderge shyn júrekten myqty densaýlyq, sarqylmas kúsh-qýat pen jaqsy kóńil kúı tileımin, – dep túıindedi óz sózin teatr dırektory.
Jızeldiń beınesin kórsetýdi, sirá, kúlli álemniń balerınalary armandaıtyn bolýy kerek. Bul rólde Karlotta Grızı, Anna Pavlova, Olga Spesıvtseva, Galına Ýlanova, Natalııa Bessmertnova, sondaı-aq «Astana Opera» balerınalaryna osynaý shyn mánisinde kúrdeli partııanyń úlgili oryndaýyn bere bilgen ataqty Altynaı Asylmuratova óner kórsetti.
Kóktemniń shýaqty kúnderi kópshilik kórermen túrli ártisterdiń sheberligin baǵalaı alady. Aıta ketý kerek, ár oryndaýshylar quramy osy horeografııa jaýharyna óz boıaýlary men jan tolǵanystaryn salyp, keıipkerlerdiń minez-qulyqtaryn ózderinshe taldaıdy.
Sonymen, 6 naýryzda Jızel partııasynda Qazaqstannyń eńbek sińirgen qaıratkeri, «Astana Operanyń» jetekshi solısi Áıgerim Beketaeva óner kórsetse, Alberttiń beınesin Qazaqstannyń eńbek sińirgen qaıratkeri Erkin Rahmatýllaev tanystyrdy, Gans – Bekzat Orynbaev (debıýt), Mırta – Erkejan Júnisova, Vılfrıd – Oljas Ánýarbek, Kirispe pa-de-de – Móldir Shákimova, Aıbar Toqtar. Al 7 naýryzda Jızeldi Qazaqstannyń eńbek sińirgen qaıratkeri Mádına Basbaeva alǵash ret oryndaıtyn bolsa, onyń súıiktisi Alberttiń partııasynda Danııar Jumataev debıýt jasaıdy. Gans – Qýat Káribaev (debıýt), Mırta – Sofııa Ádilhanova (debıýt), Vılfrıd – Oleg Leontev, Kirispe pa-de-de – Shuǵyla Ádephan, Rýstam Chahalov. Mereke kúni, 8 naýryzda Jızeldiń rólinde Anastasııa Zaklınskaıa óner kórsetse, onyń sahnadaǵy juby Oljas Tarlanov Alberttiń rólinde shyǵady, Gans – Bekzat Orynbaev. Mırta – Erkejan Júnisova, Vılfrıd – Oljas Ánýarbek, Kirispe pa-de-de – Adelına Tólepova, Islam Qaıypbaı (debıýt).
Qoıýshy baletmeıster Altynaı Asylmuratovamen birge, spektakldiń qoıylymynda onyń assıstentteri – Reseıdiń Halyq ártisi Konstantın Zaklınskıı men Elena Sherstneva jumys istedi. Sahna jabdyqtary zamanymyzdyń áıgili stsenografy, ókinishke oraı, jýyrda ómirden ozǵan Etsıo Frıdjerıoǵa tıesili. Ǵalamat ásemdelgen sahnalyq kıimderdi kostıýmder boıynsha sýretshi, «Oskar» syılyǵynyń ıegeri Franka Skýarchapıno jasap shyǵardy. Dırıjer tuǵyryna mereke kúnderi Qazaqstannyń eńbek sińirgen qaıratkeri Abzal Muhıtdın shyǵady. Shyǵarmashylyq ujymnyń eńbegin osy kúnderi saǵat 18.00-de baǵalaýǵa bolady.
