«Astana Opera» gastroldik saparmen Tashkentke barady
NUR-SULTAN. QazAqparat - «Astana Opera» teatry gastroldik saparmen Ózbekstan astanasy Tashkentke barady, dep habarlaıdy QazAqparat teatrdyń baspasóz qyzmetine silteme jasap.
Ózbekstandaǵy Qazaqstan jyly aıasynda «Astana Opera» teatrynyń trýppasy Tashkenttegi gastrolinde qazaqstandyq ári álemdik klassıka jaýharlaryn usynbaq - 10 shilde kúni A.Jubanov, L.Hamıdıdiń «Abaı» operasy, 13 shildede Dj.Pýchchınıdiń «Madam Batterflıaı» operasy kórermenge jol tartady. Gastrol Qazaqstan Respýblıkasy Mádenıet jáne sport mınıstrliginiń qoldaýymen Álisher Naýaı atyndaǵy Ózbekstan Memlekettik akademııalyq Úlken teatry sahnasynda ótedi.
Bul - «Astana Opera» teatrynyń tarıhynda Ózbekstandaǵy alǵashqy týry ekenin atap ótken jón. Gastroldik afıshaǵa «Abaı» operasy kezdeısoq engen joq, sebebi keler jyly álemdik mýzykalyq qaýymdastyq mereıli kúndi - qazaqtyń uly aqyny, kompozıtor, aǵartýshy ári oıshyl Abaıdyń 175 jyldyǵyn atap ótedi.
Ózbekstandyq kórermen tanymal ánshiler - Súndet Baıǵojın, Saltanat Ahmetova, Meıir Baınesh, Beıimbet Tańaryqov, Talǵat Ǵaleev, Tatıana Vıtsınskaıa, Erjan Saıpov, Bolat Esimhanov, Ramzat Balakıshıev, Shyńǵys Rasylhan jáne t.b. ónerpazdardyń tamasha daýystarymen, keremet oıynymen tanysa alady.
Sımfonııalyq orkestrge Qazaqstannyń eńbek sińirgen qaıratkeri, QR Memlekettik syılyǵynyń laýreaty, ataqty dırıjer - Ahmet Jubanovtyń shóberesi Alan Bóribaev jetekshilik etedi. Maestronyń arqasynda «Abaı» operasy alǵash ret Ońtústik Tıýrıngııa teatrynyń sahnasynda nemis tilinde shyrqaldy. Osy spektakldiń «Astana Operadaǵy» qoıýshy dırıjeri de ózi bolyp tabylady. Elordalyq trýppanyń oryndaýyndaǵy ulttyq klassıka jaýharyn Italııa jurtshylyǵy zor tabyspen qarsy aldy. Al 2018 jyly osy qoıylym úshin «Astana Opera» shyǵarmashylyq ujymynyń qatysýshylary QR Memlekettik syılyǵyn ıelendi.
«Abaı» operasy - Qazaqstan mádenıeti men óneriniń betke ustar týyndysy dep nyq senimmen aıtýǵa bolady.
Eske salar bolsaq, sáýir aıynda Qazaqstan Prezıdenti Qasym-Jomart Toqaev pen Ózbekstan Prezıdenti Shavkat Mırzıeev Ózbekstandaǵy Qazaqstan jylyn ashty. Óz
sózderinde Memleket basshylary Qazaqstan men Ózbekstandy biriktiretin ejelden kele jatqan dostyq pen tatý kórshilik dástúrlerin atap ótti.
Gastroldik baǵdarlamany 13 shilde kúni Dj.Pýchchınıdiń «Madam Batterflıaı» operasy jalǵastyrady. Qoıýshy dırıjer - Alan Bóribaev, rejısser - Lorentso Amato, stsenograf - aty ańyzǵa aınalǵan Etsıo Frıdjerıo, kostıýmder boıynsha sýretshi - «Oskar» syılyǵynyń ıegeri Franka Skýarchapıno.
Djakomo Pýchchınıdiń operasy - óziniń sulýlyǵymen, kórkimen Chıo-Chıo-san (Kóbelek) degen atqa ıe bolǵan jas geıshanyń úlken, shynaıy mahabbat tarıhy. Ol «gúldi kez-kelgen jerden julyp alýǵa bolady» degen jeńil oıly amerıkandyq ofıtser Pınkertondy jaqsy kórip qalady.
Basty partııalardy oryndaýshylar: shytyrman oqıǵalardy jaqsy kóretin beıqam Pınkerton beınesine Qazaqstannyń eńbek sińirgen qaıratkeri, Italııa Juldyzy Ordeniniń kavaleri Medet Chotabaev daıyndalýda. Kúrdeli Madam Batterflıaı partııasyn Qazaqstannyń eńbek sińirgen ártisi Jannat Baqtaı oryndaıdy. Adal qyzmetshi Sýzýkıdi Qazaqstannyń eńbek sińirgen qaıratkeri Dına Hamzına usynady. Begzat amerıkandyq konsýl Sharplestiń beınesin ózbek sahnasynda Qazaqstannyń eńbek sińirgen qaıratkeri Talǵat Musabaev somdaıdy.
Sahna tórinde oryn alǵan tutas álem kórermen nazaryn baýraıdy. Ol úshin biregeı tolyq masshtabty qurylymdar - kún men juldyzdardyń shaǵylysýyn kórýge múmkindik beretin 18 metrlik basseın paıdalanylatyn bolady. Aǵashtan, bambýktan jasalǵan shaǵyn dástúrli úıler tamsandyrary anyq, al sahnanyń ishki kórinisi sakýra butaqtarymen jáne sýrettermen bezendirilgen.
Spektaklderdiń bastalýy saǵat 19:00-de.
