«Astana Opera» gastroldik saparmen Italııa men Lıtvaǵa attandy

«Eýropa qalalary boıynsha gastroldik afıshasyna A.Hachatýrıannyń áıgili «Spartak» baleti engen. Ártister atalmysh qoıylymdy Rımde 1-2 shilde kúnderi Teatro dell'Opera di Roma teatrynda sahnalaıdy. Al úsh kúnnen soń - 5 shildede keremet Gala-balet baǵdarlamasymen Lıtvanyń Kaýnas qalasynda óner kórsetedi. «Astana Opera» balet trýppasynyń kórkemdik jetekshisi - Reseıdiń Halyq ártisi Altynaı Asylmuratova» - dedi teatrdyń baspasóz qyzmetinen.

«Spartak» baletindegi basty partııany Italııa astanasy kórermenderiniń, sondaı-aq Genýıa, Mılan, Ravenna jáne Spoleto jurtynyń ystyq yqylasyna bólengen tamasha bıshi Baqtııar Adamjan oryndaıdy.

Áıgerim Beketaeva jaqynda ǵana tól sahnada Frıgııa partııasynda debıýt jasady. Onyń názik keıipkeri Spartakqa mahabbatyn syılap, jan azabyn umyttyryp qana qoımaı, kúresýge shabyt beredi.

Krasstyń partııasyn Arman Orazov daıyndaýda, Egına - Ásel Shaıkenova, Gladıator - Serik Naqysbekov jáne taǵy basqalar.

Bul ataqty balettiń 20-dan astam nusqasy bar. Ol dúnıe júzi boıynsha qoıylýda. Biraq kórnekti baletmeıster ıÝrıı Grıgorovıchtyń Úlken teatrda qoıǵan «Spartagy» eń úzdik bolyp tabylady. Ony horeograftyń ózi «Astana Opera» sahnasyna alyp kelgen, endi osynaý balet óneriniń jaýharyn rımdik jurtshylyq tamashalaıdy. Ár kúnderi «Astana Opera» Sımfonııalyq orkestrine Abzal Muhıtdınov pen Arman Orazǵalıev jetekshilik etedi.

Teatr trýppasyn lıtvalyq kórermen de asyǵa kútýde, 5 shilde kúni ótetin Gala-balet afıshalary kópten beri Kaýnas qalasynyń sánin keltirýde. Eki bólimnen turatyn baǵdarlamaǵa - klassıkalyq baletterden pa-de-de, otandyq ári sheteldik zamanaýı horeograftardyń mınıatıýralary endi. Qazaqstannyń eńbek sińirgen qaıratkerleri Áıgerim Beketaeva men Baqtııar Adamjannyń oryndaýyndaǵy M.Jarrdyń mýzykasyna HH ǵasyrdaǵy uly baletmeıster R.Petıdiń horeografııasyndaǵy «Parıj Qudaı anasynyń sobory» baletinen dýet pen Qazaqstannyń eńbek sińirgen qaıratkerleri Gaýhar Ýsına men Rústem Seıitbekovtiń oryndaýyndaǵy J.Bızeniń mýzykasyna R.Petıdiń horeografııasyndaǵy «Karmen» baletinen dýet Gala keshtiń injý marjanyna aınalmaq.

Sondaı-aq baǵdarlamaǵa qazaqstandyq kompozıtor A.Raıymqulovanyń mýzykasyna belgili shveıtsarııalyq baletmeıster Ksenııa Zverevanyń horeografııasyndaǵy «Zaman tynysy» baletinen eki keremet dýet engen. Dýetti Qazaqstannyń eńbek sińirgen qaıratkeri Ánel Rústemova men Oljas Tarlanov usynady. Tartymdylyǵy jaǵynan esh kem túspeıtin taǵy bir nómir - Dj.Ýılıamstyń mýzykasyna «Joǵalǵan jumaq» kórinisin Qazaqstannyń eńbek sińirgen qaıratkeri Gaýhar Ýsına men Jánibek Imanqulovtyń ınterpretatsııasynda tamashalaýǵa bolady.

Sonymen qatar M.Petıpanyń horeografııasyndaǵy tanymal ári barshanyń súıikti «Jızel» baletinen pa-de-de kórermenge qýanysh syılaıtyn bolady. Ataqty spektakl jaqynda ǵana elordalyq teatrdyń repertýaryn tolyqtyrdy, nómirdi daryndy ártister Anastasııa Zaklınskaıa men Oljas Tarlanov oryndaıdy.

Kórermenderge óz ónerin Qazaqstannyń eńbek sińirgen qaıratkeri Ánel Rústemova, Serik Naqyspekov, Erkin Rahmatýllaev jáne ózge de ónerpazdar pash etpek.

Gastrol «Rýhanı jańǵyrý» baǵdarlamasy aıasynda QR Mádenıet jáne sport mınıstrliginiń qoldaýymen ótedi.